ភាពតានតឹងកំពុងកើនឡើង រវាងឥស្សរជនខាងនយោបាយ និងយោធារបស់អ៊ីស្រាអែល ជុំវិញការទទួលខុសត្រូវ ចំពោះការបរាជ័យ នៅពីក្រោយការវាយប្រហាររបស់ក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣ ដោយនាយករដ្ឋមន្ត្រី លោក Benjamin Netanyahu ត្រូវបានចោទប្រកាន់ថា បានគេចពីការទទួលខុសត្រូវ។

ការតវ៉ាប្រចាំសប្តាហ៍ ប្រឆាំងនឹងការដឹកនាំរបស់លោក Netanyahu ចំពោះសង្រ្គាមរយៈពេល ២ឆ្នាំបន្តបន្ទាប់គ្នា នៅតំបន់ហ្កាហ្សា និងការទាមទារឲ្យមានការវិលត្រឡប់របស់ចំណាប់ថ្នូរ បានក្លាយជានិមិត្តរូបនៃកំហឹងដ៏ពុះកញ្ជ្រោល នៅក្នុងមជ្ឈដ្ឋានជាច្រើននៃសង្គមអ៊ីស្រាអែល ជុំវិញរបៀបដែលការវាយប្រហារ និងផលប៉ះពាល់ពីហេតុការណ៍នេះ ត្រូវបានដោះស្រាយ។

ពាក់ព័ន្ធនឹងភាពបរាជ័យនេះ សាធារណជនអ៊ីស្រាអែលភាគច្រើន បាននិងកំពុងអំពាវនាវឲ្យមានការស៊ើបអង្កេតឯករាជ្យ លើព្រឹត្តិការណ៍ដែលនាំទៅដល់ការវាយប្រហាររបស់ក្រុមហាម៉ាស ក្នុងឆ្នាំ២០២៣ ដែលបណ្តាលឲ្យមនុស្សយ៉ាងតិច ១.២២១នាក់ បានបាត់បង់ជីវិត។

ជាមួយគ្នានេះ ការស្ទង់មតិ បង្ហាញថា ប្រជាជនអ៊ីស្រាអែលជាង ៧០ភាគរយ ចង់ឲ្យគណៈកម្មាការស៊ើបអង្កេតរដ្ឋដែលត្រូវបានបង្កើតឡើង នាពេលកន្លងមក ស៊ើបអង្កេតការបរាជ័យធំៗកម្រិតរដ្ឋ។

អស់រយៈពេលជាង ២ឆ្នាំក្រោយការវាយប្រហាររបស់ក្រុមហាម៉ាស គ្មានការស៊ើបអង្កេតត្រូវបានធ្វើឡើងឡើយ ហើយលោក Netanyahu បានច្រានចោលគំនិតនេះម្តងទៀតនៅក្នុងសភា កាលពីថ្ងៃទី១០ ខែវិច្ឆិកា ដោយចោទក្រុមប្រឆាំងថា បានព្យាយាមប្រែក្លាយបញ្ហានេះឲ្យទៅជា «ឧបករណ៍នយោបាយ»៕