ប្រធានាធិបតីអាមេរិក លោក Donald Trump បានបញ្ជាក់កាលពីល្ងាចថ្ងៃព្រហស្បតិ៍ (២៧ វិច្ឆិកា) ថា សមាជិកម្នាក់ក្នុងចំណោមសមាជិកពីរនាក់ នៃកងឆ្មាំជាតិរបស់សហរដ្ឋអាមេរិក ដែលរងការបាញ់ប្រហារដ៏ធំមួយនៅទីក្រុងវ៉ាស៊ីនតោនឌីស៊ី កាលពីថ្ងៃពុធកន្លងទៅ បានស្លាប់ហើយ។

ប្រធានាធិបតី Trump បានបន្តថា អ្នកស្លាប់នោះឈ្មោះ នាង Sarah Beckstrom វ័យ ២០ឆ្នាំ បានស្លាប់ដោយសាររបួសធ្ងន់ធ្ងរ។ សមាជិកឆ្មាំជាតិទីពីរដែលក៏ត្រូវបានបាញ់ផងដែរនោះឈ្មោះ លោក Andrew Wolfe វ័យ ២៤ឆ្នាំ។ ក្រុមមន្ត្រីបាននិយាយកាលពីថ្ងៃព្រហស្បតិ៍ដដែលថា លោក Wolfe នៅតែស្ថិតក្នុងស្ថានភាពធ្ងន់ធ្ងរបំផុត។

ឆ្មាំជាតិទាំងពីរនាក់នេះ ត្រូវបានបាញ់ប្រហារនៅចម្ងាយជិត ក្បែរទីលានចតុរង្គ Farragut ក្នុងតំបន់ទីប្រជុំជន បន្ទាប់ពីម៉ោងក្នុងស្រុក ១៤:០០ កាលពីថ្ងៃពុធ។ នគរបាលបានចាប់ខ្លួនជនសង្ស័យម្នាក់ក្នុងការបាញ់ប្រហារនោះ ឈ្មោះ Rahmanullah Lakanwal អាយុ ២៩ឆ្នាំ មកពីអាហ្វហ្គានីស្ថាន។

ទីតាំងនៃការបាញ់ប្រហារ កើតឡើងចម្ងាយត្រឹមតែប៉ុន្មានអគារប៉ុណ្ណោះដល់សេតវិមាន ហើយក្រុមមន្ត្រីអនុវត្តច្បាប់ជាច្រើន បានទៅដល់កន្លែងកើតហេតុភ្លាមៗ ដើម្បីជួយជនរងគ្រោះទាំងពីរនាក់ និងចាប់ខ្មាន់កាំភ្លើង។ រដ្ឋមន្រ្តីក្រសួងយុត្តិធម៌អាមេរិក លោកស្រី Pam Bondi បានប្រាប់ទូរទស្សន៍ Fox News កាលពីថ្ងៃព្រហស្បតិ៍ថា ការិយាល័យយុត្តិធម៌នឹងស្វះស្វែងរកការកាត់ទោសប្រហារជីវិតប្រឆាំងនឹងជនសង្ស័យរូបនេះ៕