ក្រុមមន្ត្រីនៅក្រសួងសន្តិសុខមាតុភូមិ (DHS) របស់អាមេរិក បាននិយាយកាលពីថ្ងៃព្រហស្បតិ៍ (២៧ វិច្ឆិកា) ថា លោកប្រធានាធិបតី Donald Trump បានបញ្ជាឱ្យបើកការពិនិត្យឡើងវិញយ៉ាងទូលំទូលាយ លើករណីសិទ្ធិជ្រកកោនដែលអនុម័តក្រោមរដ្ឋបាលរបស់អតីតប្រធានាធិបតី Joe Biden និងបណ្ណបៃតង (Green Card) ដែលបានចេញឱ្យប្រជាពលរដ្ឋនៃប្រទេសចំនួន១៩។

ក្រុមមន្ត្រីនិយាយថា ជនអន្តោប្រវេសន៍អាហ្វហ្គានីស្ថាន ដែលសង្ស័យថាបានបាញ់ប្រហារលើសមាជិកឆ្មាំជាតិ ២នាក់ នៅក្នុងទីក្រុងវ៉ាស៊ីនតោនឌីស៊ី កាលពីថ្ងៃពុធកន្លងទៅ បានចូលសហរដ្ឋអាមេរិក ក្នុងឆ្នាំ២០២១ ក្រោមកម្មវិធីតាំងទីលំនៅថ្មី។ ប៉ុន្មានម៉ោងបន្ទាប់ពីការបាញ់ប្រហារ ដែលនាំឱ្យសមាជិកឆ្មាំជាតិម្នាក់ស្លាប់និងម្នាក់របួសធ្ងន់ សេវាសញ្ជាតិ និងអន្តោប្រវេសន៍របស់អាមេរិក (USCIS) បានប្រកាសផ្អាកជាបន្ទាន់ និងមិនកំណត់ នៃសំណើអន្តោប្រវេសន៍ទាំងអស់ ដែលទាក់ទងនឹងជនជាតិអាហ្វហ្គានីស្ថាន។

កាលពីថ្ងៃព្រហស្បតិ៍ ក្រសួង DHS និយាយថា រដ្ឋបាលលោក Trump កំពុងពង្រីកការពិនិត្យឡើងវិញ និងគ្របដណ្ដប់លើករណីសិទ្ធិជ្រកកោនទាំងអស់ ដែលអនុម័តក្រោមរដ្ឋបាលលោក Biden ។ ប្រធានសេវាសញ្ជាតិ USCIS លោក Joseph Edlow បាននិយាយថា លោកកំពុងបើក "ការត្រួតពិនិត្យទ្រង់ទ្រាយធំ និងហ្មត់ចត់នៃរាល់បណ្ណបៃតងសម្រាប់ជនបរទេសគ្រប់រូបពីគ្រប់ប្រទេស ដែលគួរឱ្យបារម្ភ" តាមសំណើរបស់លោក Trump ។

លោក Edlow មិនបានបញ្ជាក់ទេថា ប្រទេសណាខ្លះត្រូវអាមេរិកចាត់ទុកថាជាប្រទេសគួរឱ្យបារម្ភ។ សាវាសញ្ជាតិ USCIS បានចង្អុលទៅបញ្ជីហាមឃាត់ការធ្វើដំណើរដែលលោក Trump បានដាក់កាលពីខែមិថុនា លើពលរដ្ឋ ១៩ប្រទេស រួមទាំងអាហ្វហ្គានីស្ថាន ប៊ូរុនឌី ឡាវ តូហ្គោ វ៉េណេស៊ុយអេឡា សៀរ៉ាឡេអូន និងតូមិននីស្ថានជាដើម៕