​រុស្ស៊ី៖ លោក​ប្រធានាធិបតី​រុស្ស៊ី Vladimir Putin បាន​និយាយថា កិច្ចខិតខំ​ខាង​ការទូតចាំបាច់​ត្រូវ​ពង្រីក​បន្ថែមដើម្បី​ស្វែងរក​ដំណោះស្រាយ​ចំពោះ​វិបត្តិ​អ៊ុយ​ក្រែ​ន ជា​សញ្ញា​មួយដែល​ទីក្រុង Moscow អាច​ត្រៀមខ្លួន​ក្នុង​មធ្យោបាយ​ចរចា​ ដើម្បី​ដើរ​លុបបំបាត់​ការ​គំរាម​នៃ​ផ្ទុះ​សង្គ្រាម​នៅក្នុង​តំបន់​អឺរ៉ុប​។ ​បន្ទាប់ពី​ការសន្ទនា​តាម​ទូរស័ព្ទ​ជាមួយ​ប្រធានាធិបតី​បារាំង​លោក Emmanuel Macron កាលពី​ថ្ងៃអាទិត្យលោក Putin បាន​ស្ដីបន្ទោស​អង្គការ NATO ចំពោះ​ការបង្កើន​អាវុធ និង​គ្រាប់រំសេវ​ទំនើបៗចូលទៅក្នុង​ប្រទេស​អ៊ុយ​ក្រែ​ន​។​

ការសន្ទនា​តាម​ទូរស័ព្ទ​រវាង​មេ​ដឹក​នា​ទាំង​ ២ ​កើតឡើង ២​សប្ដាហ៍បន្ទាប់ពី​លោក Macron បានធ្វើ​ដំណើរ​ទៅកាន់​ទីក្រុង Moscow ដើម្បី​បញ្ចុះបញ្ចូលលោក Putin ឲ្យ​បញ្ឈប់​ការបញ្ជូន​កងទ័ព​ទៅកាន់​ព្រំដែន​ជាប់​អ៊ុយ​ក្រែ​ន​។ ​សេចក្ដី​ថ្លែង​ការ​របស់​វិមាន​ក្រឹម​ឡាំងបាន​និយាយថា លោក Putin ​និង​លោក Macron បាន​ពិភាក្សា​ពី​ការផ្គត់ផ្គង់​អាវុធ និង​គ្រាប់រំសេវពី​សំណាក់​បណ្ដា​ប្រទេស​ជា​សមាជិក​របស់​អង្គការ NATO ទៅកាន់​អ៊ុយ​ក្រែ​ន ដែល​វិមាន​ក្រឹម​ឡាំង​និយាយថា ខ្លួន​កំពុង​ជំរុញ​ឲ្យ​ទីក្រុង​គៀវ (Kyiv) ស្វែងរក​ដំណោះស្រាយ​យោធា​ប្រឆាំងនឹង​ក្រុម​អ្នក​បំបែក​ខ្លួន នៅក្នុង​ភាគ​ខាងកើត​របស់​ប្រទេស​នេះ​។​ ​លោក Putin និង​លោក Macron​ បាន​ព្រមព្រៀងគ្នា​លើ​កិច្ចខិតខំ​ប្រឹងប្រែង​ទាំងនេះ ដែល​គួរតែ​ធ្វើឡើង​តាមរយៈ​ប្រមុខ​ការទូត និង​ក្រុម​តំណាង​មកពី​ប្រទេស​បារាំង អាល្លឺម៉ង់ រុស្ស៊ី និង​អ៊ុយ​ក្រែ​នដែល​បង្កើត​ឲ្យ​មានការ​ចរចា​ក្រុម ​៤​ប្រទេស​ដែលមាន​ឈ្មោះថា Normandy៕

អត្ថបទ៖ សុខមាន