យោងតាមអ្នករៀបចំមកពីរណសិរ្សដើម្បីប្រជាធិបតេយ្យ(Frenadeso)បានឲ្យដឹងថា ប្រជាជនប៉ាណាម៉ារាប់សិបនាក់ បានមកប្រមូលផ្តុំគ្នានៅខាងក្រៅក្រសួងការបរទេសក្នុងទីក្រុងប៉ាណាម៉ាកាលពីថ្ងៃព្រហស្បតិ៍ ទី២៧ ខែវិច្ឆិកា ដើម្បីតវ៉ាប្រឆាំងនឹងអ្វីដែលពួកគេមើលឃើញថាជាការចូលរួមរបស់យោធាសហរដ្ឋអាមេរិកកាន់តែខ្លាំងឡើងនៅក្នុងប្រទេសនេះ។

ក្រុមបាតុករបាននាំយកលិខិតទាមទារមួយច្បាប់ អំពាវនាវឱ្យរដ្ឋាភិបាលបដិសេធអន្តរាគមន៍ណាមួយរបស់សហរដ្ឋអាមេរិក និងបង្ហាញថាតើចំនួនកងទ័ពសហរដ្ឋអាមេរិកមានចំនួនប៉ុន្មាន និងប្រភេទអាវុធអ្វីខ្លះដែលបច្ចុប្បន្នស្ថិតនៅក្នុងប្រទេសប៉ាណាម៉ា នេះបើយោងតាមអ្នកសម្របសម្រួល Frenadeso លោក Jorge Guzman។

ក្រុមបាតុករ បានកាន់បដាដែលមានអំណានថា «អាមេរិកឡាទីន និងតំបន់ការ៉ាអ៊ីប ជាតំបន់សន្តិភាព» ដោយនិយាយសំដៅទៅលើសម្ពាធយោធាសហរដ្ឋអាមេរិកដែលកំពុងកើនឡើងលើប្រទេសវ៉េណេស៊ុយអេឡា។ ក្រុមបាតុករ ក៏បានគ្រវីទង់ជាតិនិងបដា ខណៈលោក Guzman បានអះអាងថា រូបភាពដែលកំពុងចែកចាយនៅលើបណ្តាញផ្សព្វផ្សាយសង្គមបង្ហាញពីរថក្រោះ រថពាសដែក និងយុទ្ធោបករណ៍កងទ័ពថ្មើរជើងផ្សេងទៀត កំពុងធ្វើប្រតិបត្តិការនៅលើទឹកដីប្រទេសប៉ាណាម៉ា។

ក្រុមនេះបានជំរុញបន្ថែមទៀតដល់អាជ្ញាធរឱ្យប្រឆាំងនឹងការបង្កើតមូលដ្ឋានយោធាសហរដ្ឋអាមេរិកដែលអាចកើតមាន និងឲ្យដកខ្លួនចេញពីកិច្ចព្រមព្រៀងសហប្រតិបត្តិការសន្តិសុខជាមួយទីក្រុងវ៉ាស៊ីនតោន ដែលពួកគេចាត់ទុកថាជាការគំរាមកំហែងដល់អធិបតេយ្យភាពជាតិ។ ប្រទេសប៉ាណាម៉ាបានទទួលធ្វើជាម្ចាស់ផ្ទះនៃបេសកកម្មសហប្រតិបត្តិការសន្តិសុខនិងប្រឆាំងគ្រឿងញៀនរបស់សហរដ្ឋអាមេរិកជាយូរមកហើយ បានធ្វើឱ្យមានភាពរសើបឡើងវិញជុំវិញវត្តមានយោធាបរទេសជាច្រើនទសវត្សរ៍ បន្ទាប់ពីសហរដ្ឋអាមេរិកបានប្រគល់ការគ្រប់គ្រងព្រែកជីកប៉ាណាម៉ា។