ទូរទស្សន៍រដ្ឋស៊ីរីបានរាយការណ៍នៅថ្ងៃសុក្រនេះថា យ៉ាងហោចណាស់មនុស្ស ១០នាក់ ត្រូវបានសម្លាប់ដោយកងកម្លាំងអ៊ីស្រាអែល នៅក្នុងភូមិមួយភាគខាងត្បូងនៃប្រទេសស៊ីរី កាលពីយប់ថ្ងៃព្រហស្បតិ៍។

ទូរទស្សន៍រដ្ឋស៊ីរីបានអះអាងថា៖«ចំនួនអ្នកស្លាប់ដោយសារការឈ្លានពានរបស់អ៊ីស្រាអែល...បានកើនឡើងដល់ ១០នាក់ ក្នុងនោះមានស្ត្រី និងកុមារ ខណៈពេលដែលអ្នកផ្សេងទៀត នៅតែជាប់នៅក្រោមគំនរបាក់បែក» ដោយបន្ថែមថា គ្រួសាររាប់សិបគ្រួសារ បានរត់គេចខ្លួនចេញពីភូមិ Beit Jin ទៅកាន់កន្លែងសុវត្ថិភាព នៅតំបន់ក្បែរនោះ។

កងកម្លាំងការពារអ៊ីស្រាអែល បាននិយាយនៅថ្ងៃសុក្រនេះថា កងទ័ពអ៊ីស្រាអែល បានចាប់ខ្លួនសមាជិក នៃអ្វីដែលយោធាហៅថា ជាអង្គការឥស្លាម Jemaah ក្នុងអំឡុងពេលប្រតិបត្តិការពេញមួយយប់ នៅក្នុងភូមិ Beit Jin របស់ប្រទេសស៊ីរី។

យោធាបានបន្តថា ការវាយឆ្មក់នេះ ត្រូវបានចាប់ផ្តើមដោយកងទ័ព បន្ទាប់ពីព័ត៌មានស៊ើបការណ៍សម្ងាត់ដែលប្រមូលបានក្នុងប៉ុន្មានសប្តាហ៍ថ្មីៗនេះ បានបង្ហាញថា ក្រុមនេះ កំពុងជំរុញផែនការសម្រាប់ការវាយប្រហារប្រឆាំងនឹងជនស៊ីវិលអ៊ីស្រាអែល៕