អំឡុងពេលរាជដំណើរទស្សនកិច្ចលើកដំបូងរបស់ទ្រង់នៅខាងក្រៅប្រទេសអ៊ីតាលី ក្នុងនាមជាប្រមុខដឹកនាំសាសនាកាតូលិក សម្តេចប៉ាប Leo បានមានបន្ទូល កាលពីថ្ងៃព្រហស្បតិ៍ (២៧ វិច្ឆិកា) ថា ពិភពលោកកំពុងមើលឃើញជម្លោះដ៏បង្ហូរឈាមមិនធម្មតា ហើយបានព្រមានថា សង្រ្គាមលោកលើកទីបី កំពុងបង្ហាញឡើងបន្តិចម្តងៗ ដែលបង្កហានិភ័យដល់អនាគតរបស់មនុស្សជាតិ។

នៅក្នុងបន្ទូលដំបូងរបស់ទ្រង់នៅក្រៅប្រទេស ចាប់តាំងពីស្នងតំណែងដ៏ខ្ពង់ខ្ពស់នេះនៅក្នុងខែឧសភាមក ដើម្បីដឹកនាំសាសនាចក្រកាតូលិក ដែលមានសាសនិក ១,៤ពាន់លាននាក់ — សម្ដេចប៉ាប Leo ដែលជាសម្តេចប៉ាបជនជាតិអាមេរិកអង្គដំបូង បានមានបន្ទូលថា "មហិច្ឆតានិងជម្រើសដែលជាន់ឈ្លីយុត្តិធម៌និងសន្តិភាព" កំពុងធ្វើឱ្យពិភពលោកអស្ថិរភាព។

ទ្រង់បានមានបន្ទូលប្រាប់មេដឹកនាំនយោបាយនៅប្រទេសទួរគីថា ពិភពលោកកំពុងជួបប្រទះ "កម្រិតនៃជម្លោះកាន់តែខ្លាំងឡើងក្នុងពិភពលោក ជំរុញដោយយុទ្ធសាស្រ្តនៃអំណាចសេដ្ឋកិច្ចនិងយោធា ហើយអនាគតមនុស្សជាតិកំពុងស្ថិតនៅក្នុងហានិភ័យ"។

សម្តេចប៉ាបអង្គនេះ បានជ្រើសរើសប្រទេសទួរគី ដែលសម្បូរដោយជនជាតិមូស្លីម ជាគោលដៅរាជទស្សនកិច្ចក្រៅប្រទេសលើកដំបូងរបស់ទ្រង់ ដើម្បីប្រារព្ធខួបលើកទី ១.៧០០ នៃក្រុមប្រឹក្សាសាសនាចក្រដំបូងបង្អស់នៅទីនោះ ដែលបានបង្កើតឡើងនូវគម្ពីរជំនឿសាសនា Nicene Creed ដែលនៅតែប្រើប្រាស់ដោយគ្រិស្តបរិស័ទភាគច្រើននៃពិភពលោក នាពេលបច្ចុប្បន្ន៕