ជិះសេះ៖ លោកស្រី ទេព ម៉ូណា ប្រធានសហព័ន្ធកម្ពុជាបង្ហាត់ជិះសេះបានបង្ហើបថា នឹងបន្ដរៀបចំការប្រកួតដ៏ធំមួយទៀតនាពេលឆាប់ៗខាងមុខដើម្បីសម្រួចសមត្ថភាព និងបច្ចេកទេសកីឡាករ-កីឡាការិនីត្រៀមឆ្ពោះទៅស៊ីហ្គេមឆ្នាំ២០២៣ បន្ទាប់ពីសហព័ន្ធទទួលបានជោគជ័យក្នុងការប្រកួតជ្រើសរើសជើងឯកថ្នាក់ជាតិឆ្នាំ២០២១។
ការគូសបញ្ជាក់នេះ បន្ទាប់ពីសហព័ន្ធបានបញ្ចប់ការប្រកួតកីឡាជិះសេះ ជ្រើសរើសជើងឯកថ្នាក់ជាតិប្រចាំឆ្នាំ២០២២១ លើវិញ្ញាសាលោតផ្លោះរបារ (Jumping) នៅមជ្ឈមណ្ឌលកីឡា Cambodian Country Club កាលពីថ្ងៃទី២០ ខែកុម្ភៈ ឆ្នាំ២០២២ ម្សិលមិញ ក្នុងនោះក៏មានការចូលរួមពីតំណាងក្រសួងអប់រំ យុវជន និងកីឡាផងដែរ។ លោកស្រីបានចាត់ទុកការប្រកួតប្រចាំឆ្នាំនេះគឺជាឱកាសមួយដើម្បីវាយស្ទង់ និងប្រៀបធៀបសមត្ថភាពកីឡាករ-កីឡាការិនី សម្រាប់សម្រួចទិសដៅត្រៀមស៊ីហ្គេមឆ្នាំ២០២៣។ បន្ទាប់ពីចប់ការប្រកួតលោកស្រីបានវាយតម្លៃខ្ពស់លើភាពរីកចម្រើនរបស់កីឡាករ-កីឡាការិនីចូលរួម ពិសេសបច្ចេកទេសក្នុងការបញ្ជាសេះលោតតែម្ដង។ បន្ទាប់ពីចប់ការប្រកួតនេះ សហព័ន្ធសង្ឃឹមថា រយៈពេល ៦សប្ដាហ៍បន្ទាប់ទៀត សហព័ន្ធនឹងរៀបចំការប្រកួតដ៏ធំមួយទៀតដែលនឹងមានកីឡាករ-កីឡាការិនី ក៏ដូចជាសេះចូលរួមច្រើនជាងមុនក្នុងន័យបន្ដដុះខាតសមត្ថភាព ទាំងកីឡាករ-កីឡាការិនី និងសត្វសេះឲ្យកាន់តែយល់ចិត្តគ្នា សម្រាប់ត្រៀមស៊ីហ្គេមដែលសហព័ន្ធកំពុងសម្លឹងរកមេដាយមាស។
លោកស្រីថា មកទល់ពេលនេះចំពោះពេលវេលាត្រៀមស៊ីហ្គេម ហាក់មានភាពប្រថុចញ៉ុចសម្រាប់សហព័ន្ធកីឡាជិះសេះ តែផ្អែកលើការយកចិត្ដទុកដាក់ និងការខិតខំបង្ហាត់របស់ក្រុមការងារគ្រូទាំងខ្មែរ និងអ្នកជំនាញបារាំង គួបផ្សំជាមួយធនធានកីឡាករ-កីឡាការិនីវ័យក្មេងដែលមានសមត្ថភាព និងទេពកោសល្យ លោកស្រីរំពឹងថា ពួកគេនឹងអាចសម្រេចដណ្ដើមមេដាយជូនជាតិក្នុងព្រឹត្តិការណ៍ជាប្រវត្តិសាស្ដ្រនេះ។ សម្រាប់ការប្រកួតជើងឯកថ្នាក់ជាតិឆ្នាំនេះមាន ២វិញ្ញាសាដែលជាវិញ្ញាសាត្រៀមស៊ីហ្គេមគឺវិញ្ញាសាលោតផ្លោះរបារ ប្រកួតនៅមជ្ឈមណ្ឌលកីឡា CCC និងវិញ្ញាសារត់ចម្ងាយឆ្ងាយប្រកួតនៅរមណីយដ្ឋានដំណាក់ដំរី ខេត្តកំពង់ស្ពឺ ដោយមានកីឡាករ-កីឡាការិនីចូលរួមសរុប ១៤រូប។ ចំពោះលទ្ធផលវិញ្ញាសាលោតផ្លោះរបារលេខ១ បានទៅកីឡាករ គិរី ចាន់តុលា, លេខ២ កីឡាការិនី នរោត្តម Amrita និងលេខ៣ ស្ទួនបានទៅកីឡាករ គង់ រតនា និងកីឡាករ គ្រី សារឿន។ រីឯវិញ្ញាសារត់ចម្ងាយឆ្ងាយនៅមិនទាន់បញ្ចប់នោះទេ ដោយកំពុងបន្ដការប្រកួតរហូតគ្រប់ចម្ងាយ ៨០គីឡូម៉ែត្រ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
