អង្គការសុខភាពពិភពលោក (WHO) នៅថ្ងៃសុក្រ (ទី២៨ ខែវិច្ឆិកា) បានចេញផ្សាយជាលើកដំបូងនូវសេចក្ដីណែនាំ ដើម្បីលើកកម្ពស់ការការពារ ការរកឃើញ និងការព្យាបាលនៃភាពមិនអាចមានកូនបានដែលប៉ះពាល់ដល់មនុស្សរាប់លាននាក់ នៅទូទាំងពិភពលោក។

ប្រធានផ្នែកសុខភាពផ្លូវភេទ និងសុខភាពបន្តពូជរបស់ស្ថាប័នសុខភាពពិភពលោក លោកស្រីវេជ្ជបណ្ឌិត Pascale Allotey បាននិយាយថា៖ «មនុស្សម្នាក់ ក្នុងចំណោម ៦នាក់ ទូទាំងពិភពលោក ជួបប្រទះនឹងភាពមិនអាចមានកូនបាន អំឡុងជីវិតរបស់ពួកគេ។ ស្ថានភាពនេះប៉ះពាល់ដល់បុគ្គល និងស្វាមីភរិយា នៅទូទាំងតំបន់នានា និងកម្រិតប្រាក់ចំណូល។ ហើយលទ្ធភាពទទួលបានការថែទាំប្រកបដោយសុវត្ថិភាព និងតម្លៃសមរម្យ នៅតែមានវិសមភាពខ្ពស់»។

លោកស្រីវេជ្ជបណ្ឌិត Allotey បានប្រាប់អ្នកសារព័ត៌មានថា បញ្ហានៃភាពមិនអាចមានកូនបាន ត្រូវបានមិនអើពើ «យូរពេកហើយ»។ លោកស្រីបានបន្ថែមថា ការណែនាំថ្មីនេះនឹងផ្តល់នូវ «មូលដ្ឋានគ្រឹះដែលមានមូលដ្ឋានផ្អែកលើភស្តុតាងរួម» ដើម្បីធានាបានថា ការថែទាំមានសុវត្ថិភាព មានប្រសិទ្ធភាព និងអាចមានសម្រាប់ទាំងអស់គ្នា។

យោងតាមអង្គការសុខភាពពិភពលោក ភាពមិនអាចមានកូនបាន គឺជាស្ថានភាពនៃប្រព័ន្ធបន្តពូជទាំងរបស់បុរស និងស្ត្រី ដែលត្រូវបានកំណត់ថា ជាការមិនអាចមានផ្ទៃពោះ ក្រោយមានរយៈពេល ១២ខែ ឬយូរជាងនេះនៃសម្ព័ន្ធភាពផ្លូវភេទដែលមិនត្រូវបានការពារទៀងទាត់។ ស្ថានភាពនេះអាចនាំឲ្យមានទុក្ខព្រួយខ្លាំង ការមាក់ងាយ និងបញ្ហាលំបាកផ្នែកហិរញ្ញវត្ថុ។

សេចក្ដីណែនាំ ដែលត្រូវបានផ្សព្វផ្សាយនៅថ្ងៃទី២៨ ខែវិច្ឆិកា បានកំណត់នូវអនុសាសន៍ចំនួន ៤០ចំណុច និងអំពាវនាវឲ្យមានការរួមបញ្ចូលនៃភាពមិនអាចមានកូនបានទៅក្នុងការផ្តល់មូលនិធិសុខភាពជាតិ សេវាកម្ម និងយុទ្ធសាស្រ្តនានា។ ជាមួយគ្នានេះ ស្ថាប័នសុខភាពពិភពលោកនេះ ក៏ចង់ឃើញការមាននូវវិធានការ ដើម្បីគ្រប់គ្រងគ្លីនិកប្រកបដោយប្រសិទ្ធភាព ទាំងការធ្វើរោគវិនិច្ឆ័យ និងការព្យាបាល៕