ចំណោមអគារបាក់បែកនៅក្នុងទីក្រុង Khan Younis តំបន់ហ្កាហ្សា ធុរកិច្ច ២កន្លែងដែលធ្លាប់ទ្រទ្រង់ជនប៉ាឡេស្ទីនជាច្រើនគ្រួសារ ឥឡូវពិបាកស្តាប្រតិបត្តិការរបស់ខ្លួនឡើងវិញ រយៈពេលជាច្រើនសប្តាហ៍ ក្រោយបទឈប់បាញ់រវាងអ៊ីស្រាអែល និងក្រុមហាម៉ាស ចូលជាធរមាន ។

ការបំផ្លិចបំផ្លាញធុរកិច្ច អំឡុងសង្រ្គាមរយៈពេល ២ឆ្នាំ មិនត្រឹមតែបង្កផលប៉ះពាល់ដល់ម្ចាស់ធុរកិច្ចរបស់ពួកគេប៉ុណ្ណោះទេ ប៉ុន្តែកម្មករជាច្រើនផងដែរ ហើយនិងក្រុមគ្រួសាររបស់ពួកគេដែលពឹងផ្អែកវាសម្រាប់ប្រាក់ចំណូល ។

ទីតាំងមួយកន្លែងនៅតំបន់រោងចក្រ AlArees លោក Taha al-Maqadma គឺជាម្ចាស់ធុរកិច្ចវ័យ ៤៥ឆ្នាំមួយរូប បានដើរកាត់កន្លែងដែលធ្លាប់ផលិតការ៉េម នំសូកូឡា និងនំប៊ីស្គីត ។

លោក Al-Maqadma និយាយថា រោងចក្ររបស់លោកធ្លាប់ជួលកម្មករជាង ២០០នាក់ មុនសង្រ្គាម ដោយប្រាក់ចំណូលប្រចាំខែកើនឡើងរហូតដល់ ៣-៥ម៉ឺនដុល្លារ ជាពិសេសអំឡុងរដូវក្តៅ ។

លោកថា ដំណឹងដែលពួកយើងទទួលបានដូចផ្គររន្ទះថា រោងចក្ររងការវាយប្រហារ ។ វាធ្វើឲ្យប៉ះពាល់យ៉ាងខ្លាំងដល់អារម្មណ៍ផ្លូវចិត្តរបស់ពួកយើង ពួកយើងលែងសេសសល់អ្វីទៀតហើយ ។

លោក al-Maqadma និយាយថា មនុស្ស ២០នាក់ ត្រូវបានសម្លាប់នៅក្នុងការទម្លាក់គ្រាប់បែករបស់អ៊ីស្រាអែលលើរោងចក្រមួយកន្លែងនេះ រួមទាំងប្អូនប្រុស ២នាក់របស់លោកផងដែរ ។

របាយការណ៍អង្គការសហប្រជាជាតិនិយាយកាលពីថ្ងៃអង្គារកន្លងទៅថា សង្រ្គាមនៅហ្កាហ្សា និងការរឹតត្បិតសេដ្ឋកិច្ចនៅតំបន់កាន់កាប់វ៉េសប៊ែង ធ្វើឲ្យដួលរលំដ៏អាក្រក់បំផុតជាប់កំណត់ត្រានូវសេដ្ឋកិច្ចប៉ាឡេស្ទីន ដោយបំផ្លិចបំផ្លាញកំណើនអស់រយៈពេលជាច្រើនទសវត្សរ៍កន្លងមកនេះ ៕