លោក Andriy Yermak នាយសេនាធិការដ៏មានឥទ្ធិពលរបស់ប្រធានាធិបតី លោក Volodymyr Zelenskyy ជាសម្ព័ន្ធមិត្តជិតស្និទ្ធដែលបានដឹកនាំក្រុមចរចារបស់អ៊ុយក្រែនក្នុងកិច្ចចរចាសន្តិភាពគាំទ្រដោយសហរដ្ឋអាមេរិក បានលាលែងពីតំណែងកាលពីថ្ងៃសុក្រ ទី២៨ខែវិច្ឆិកា ប៉ុន្មានម៉ោងបន្ទាប់ពីភ្នាក់ងារប្រឆាំងអំពើពុករលួយបានចូលឆែកឆេរនៅលំនៅឋានរបស់លោក។

ការស៊ើបអង្កេតដ៏សំខាន់មួយលើអំពើពុករលួយកម្រិតខ្ពស់ ក្នុងពេលដែលអ៊ុយក្រែនកំពុងប្រយុទ្ធប្រឆាំងនឹងរុស្ស៊ីដើម្បីរស់រាន បានបង្កឱ្យមានកំហឹងជាសាធារណៈ និងបានរុញច្រានការដឹកនាំរបស់ប្រទេសនេះឱ្យធ្លាក់ចូលទៅក្នុងវិបត្តិ ខណៈទីក្រុងវ៉ាស៊ីនតោនបង្កើនសម្ពាធលើទីក្រុងគីវឱ្យឈានដល់ដំណោះស្រាយមួយ។ លោក Yermak កំពុងដឹកនាំកិច្ចខិតខំប្រឹងប្រែងរបស់អ៊ុយក្រែនដើម្បីប្រឆាំងលក្ខខណ្ឌមួយចំនួនត្រូវបានស្នើឡើងដោយសហរដ្ឋអាមេរិក ដែលនឹងបំពេញតម្រូវការជាច្រើនរបស់ទីក្រុងមូស្គូចំពោះទឹកដី និងសន្តិសុខ។ លោក Zelenskyy បាននិយាយថា លោកនឹងពិចារណាអ្នកជំនួសថ្មីនៅថ្ងៃសៅរ៍នេះ។

លោក Zelenskyy បាននិយាយកាលពីថ្ងៃសុក្រនៅក្នុងសុន្ទរកថាតាមវីដេអូថា «រុស្ស៊ីចង់ឱ្យអ៊ុយក្រែនមានកំហុស។ យើងនឹងមិនធ្វើអ្វីខុសនោះទេ» ដោយអំពាវនាវឱ្យមានសាមគ្គីភាពកាន់តែខ្លាំងឡើង។ «ការងាររបស់យើងនឹងនៅតែបន្ត ហើយការតស៊ូរបស់យើងនឹងនៅតែបន្ត»។ លោក Yermak គឺជាមិត្តជិតស្និទ្ធរបស់លោក Zelenskyy ចាប់តាំងពីថ្ងៃដែលលោកប្រធានាធិបតីជាអ្នកកំប្លែងតាមទូរទស្សន៍ ហើយបានជួយណែនាំយុទ្ធនាការឃោសនាបោះឆ្នោតដ៏ជោគជ័យរបស់លោកនៅឆ្នាំ ២០១៩។

ចាប់តាំងពីពេលនោះមក បុរសវ័យ ៥៤ ឆ្នាំរូបនេះបានក្លាយខ្លួនជាអ្នកធ្វើការសម្រេចចិត្តដ៏សំខាន់ ដោយធ្វើឲ្យមានការរិះគន់ទាំងនៅក្នុងស្រុកនិងក្រៅប្រទេសក្នុងនាមជាទីប្រឹក្សាមិនបានជាប់ឆ្នោត តែមានអំណាចធំហួស។ ការិយាល័យប្រឆាំងអំពើពុករលួយជាតិ និងការិយាល័យរដ្ឋអាជ្ញាជំនាញប្រឆាំងអំពើពុករលួយ ពុំបានបញ្ជាក់ច្បាស់ថាការស៊ើបអង្កេតណាដែលការឆែកឆេរបានជាប់ពាក់ព័ន្ធនោះទេ។