អាជ្ញាធរបាននិយាយកាលពីថ្ងៃសុក្រ ទី២៨ ខែវិច្ឆិកា ថា ទឹកជំនន់ដ៏មហន្តរាយជាច្រើនថ្ងៃនៅទូទាំងតំបន់អាស៊ីអាគ្នេយ៍បានបណ្តាលឲ្យមនុស្សជាង៣០០នាក់ស្លាប់នៅក្នុងប្រទេសឥណ្ឌូនេស៊ី ថៃ និងប្រទេសម៉ាឡេស៊ី។ ភ្លៀងធ្លាក់ខ្លាំងនៅក្នុងរដូវមូសុង រួមផ្សំជាមួយប្រព័ន្ធព្យុះត្រូពិក បានជន់លិចតំបន់ជាច្រើននៅទូទាំងប្រទេសទាំងបី ធ្វើឱ្យប្រជាជនជាប់គាំងខ្លួននៅលើដំបូលផ្ទះ និងកាត់ផ្តាច់សហគមន៍ទាំងមូល។

អាជ្ញាធរនៅក្នុងប្រទេសឥណ្ឌូនេស៊ី កំពុងព្យាយាមដើម្បីបានទៅដល់តំបន់ដែលរងផលប៉ះពាល់ខ្លាំងបំផុតនៅលើកោះស៊ូម៉ាត្រា។ មន្ត្រីកោះស៊ូម៉ាត្រាបាននិយាយថា ទឹកជំនន់ និងបំណាក់ដីនៅសប្តាហ៍នេះបានបណ្តាលឲ្យមនុស្សយ៉ាងហោចណាស់ ១៧៤ នាក់ស្លាប់ ខណៈមនុស្សជិត ៨០ នាក់ទៀតនៅបាត់ខ្លួន។ លោក Suharyanto ប្រធានទីភ្នាក់ងារកាត់បន្ថយគ្រោះមហន្តរាយជាតិ (BNPB) បាននិយាយថា ចំនួនអ្នកស្លាប់អាចកើនឡើង ខណៈក្រុមអ្នកជួយសង្គ្រោះបានទៅដល់តំបន់ដាច់ស្រយាល។ លោក និយាយថា «មានទីតាំងមួយចំនួននៅតែមិនទាន់អាចចូលទៅដល់បាន»។

ជាមួយគ្នានេះ ចំនួនអ្នកស្លាប់ដោយសារទឹកជំនន់នៅទូទាំងខេត្តភាគខាងត្បូងប្រទេសថៃ បានកើនឡើងដល់យ៉ាងហោចណាស់១៤៥នាក់ ដោយមានអ្នកស្លាប់ជាង១០០នាក់នៅក្នុងខេត្តសុងក្លាដែលរងគ្រោះខ្លាំងបំផុត នេះបើយោងតាមការប្រកាសរបស់រដ្ឋាភិបាលថៃកាលពីរសៀលថ្ងៃសុក្រ។ រយៈពេលប្រហែលមួយសប្តាហ៍មកនេះ ទឹកជំនន់ដែលមិនធ្លាប់មានពីមុនមកបានវាយប្រហារខេត្តប្រមាណ១០នៅភាគខាងត្បូងប្រទេសថៃ ដែលធ្វើឲ្យប៉ះពាល់ដល់មនុស្សសរុបជិត៣លាននាក់ ហើយតំបន់រងគ្រោះខ្លាំងជាងគេគឺហាតយ៉ៃ ក្នុងខេត្តសុងក្លា។ អាជ្ញាធរនៅមន្ទីរពេទ្យភាគខាងត្បូងប្រទេសថៃ បាននាំយករថយន្តក្លាសេដើម្បីរក្សាសាកសព បន្ទាប់ពីកន្លែងដាក់តម្កល់សពលើសសមត្ថភាព។