ប្រធានាធិបតីប្រទេសប៉េរូ លោក Jose Jeri បានប្រកាសនៅលើបណ្តាញផ្សព្វផ្សាយសង្គមថា លោកនឹងប្រកាសរដ្ឋក្នុងគ្រាអាសន្ននៅតាមព្រំដែនជាមួយប្រទេសឈីលី ដែលបង្កឱ្យមានការព្រួយបារម្ភអំពីវិបត្តិមនុស្សធម៌។ សេចក្តីថ្លែងការណ៍របស់លោក Jeri កាលពីថ្ងៃសុក្រ បានធ្វើឡើងត្រឹមតែជាងពីរសប្តាហ៍មុនការបោះឆ្នោតប្រធានាធិបតីជុំទីពីរ ដែលនឹងធ្វើឡើងនៅក្នុងប្រទេសឈីលី។

បេក្ខជនស្តាំនិយមឈានមុខ លោក Jose Antonio Kast នឹងត្រូវតទល់ជាមួយលោកស្រី Jeannette Jara ជាអ្នកឆ្វេងនិយម នៅថ្ងៃទី១៤ ខែធ្នូ ដោយលោក Jose Antonio Kast បានសន្យាថា ឃុំខ្លួន និងបណ្តេញជនអន្តោប្រវេសន៍គ្មានឯកសារនៅក្នុងប្រទេសឈីលី ប្រសិនបើលោកឈ្នះការបោះឆ្នោត។

ការសន្យាក្នុងយុទ្ធនាការនេះ បាននាំឱ្យមានការកើនឡើងការឆ្លងចូលទៅក្នុងប្រទេសប៉េរូ ភាគច្រើនជាជនជាតិវ៉េណេស៊ុយអេឡាជាអ្នកដែលស្វែងរកឱកាសជាយូរមកហើយនៅក្នុងប្រទេសឈីលី ក្នុងពេលមានបញ្ហាសេដ្ឋកិច្ចនៅក្នុងប្រទេស។ លោក Jeri ខ្លួនឯងផ្ទាល់គឺជាមេដឹកនាំស្តាំនិយម។ កាលពីពេលមុន ជាប្រធានសភាប៉េរូ លោកបានឡើងជំនួសអ្នកកាន់តំណែងមុនរបស់លោក គឺលោកស្រី Dina Boluarte ក្នុងខែតុលា។

លោកបានបញ្ជាក់ពីការរំពឹងទុករបស់ប្រព័ន្ធផ្សព្វផ្សាយអំពីស្ថានភាពគ្រាអាសន្ននៅក្នុងការបង្ហោះនៅលើវេទិកាបណ្តាញផ្សព្វផ្សាយសង្គមX ដោយលោក Jeri បានសរសេរថា «យើងនឹងប្រកាសគ្រាអាសន្ននៅតាមព្រំដែនជាមួយប្រទេសឈីលី ដើម្បីបង្កើតភាពស្ងប់ស្ងាត់ មុនពេលមានហានិភ័យនៃជនអន្តោប្រវេសន៍ចូលដោយគ្មានការអនុញ្ញាត»។