ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃសៅរ៍ (ទី២៩ ខែវិច្ឆិកា)នេះថា មេដឹកនាំចិន លោក ស៊ី ជីនពីង បានសន្យាថានឹង «បង្ក្រាបយ៉ាងម៉ឺងម៉ាត់» លើអំពើមិនសមរម្យតាមអ៊ីន  ធឺណិត និងលើកកម្ពស់លំហ   អ៊ីនធឺណិត «ស្អាតស្អំ» បន្ទាប់ពីអាជ្ញាធរទើបតែដាក់ទណ្ឌកម្មក្រុមហ៊ុនប្រព័ន្ធផ្សព្វផ្សាយសង្គមចំពោះខ្លឹមសាររបស់ពួកគេ។

ទីក្រុងប៉េកាំងតម្រូវឲ្យក្រុមហ៊ុនប្រព័ន្ធផ្សព្វផ្សាយសង្គមសម្របសម្រួលខ្លឹមសារនៅលើវេទិការបស់ពួកគេ ដោយមានការបង្ហោះដែលត្រូវបានគ្រប់គ្រងយ៉ាងតឹងរ៉ឹង ដើម្បីជៀសវាងអ្វីដែលចាត់ទុកថា ជាការបំផ្លិចបំផ្លាញពេក អាសអាភាស ឬបង្កគ្រោះថ្នាក់ជាទូទៅពីការផ្សព្វផ្សាយ។

និយតករអ៊ីនធឺណិតឈានមុខគេរបស់ប្រទេសចិន បាននិយាយកាលពីខែកញ្ញាថា ខ្លួននឹងចាត់វិធានការប្រឆាំងនឹងកម្មវិធីព័ត៌មាន Jinri Toutiao របស់ក្រុមហ៊ុនបច្ចេកវិទ្យាអ៊ីនធឺណិត ByteDance និងកម្មវិធី ស្រាវជ្រាវតាមអ៊ីនធឺណិត UCWeb របស់ក្រុមហ៊ុន Alibaba ពីបទចោទប្រកាន់ថា បង្ហាញខ្លឹមសារដែលធ្វើឲ្យខូចប្រយោជន៍។

នៅខែកញ្ញានោះដែរ រដ្ឋបាលលំហអ៊ីនធឺណិតចិន (CAC) បានប្រកាសយុទ្ធនាការរយៈពេល ពីរខែ ដែលមានគោលបំណង «គ្រប់គ្រងការញុះញង់បង្កឲ្យមានជម្លោះ និងជំរុញអំពើហិង្សា និងបណ្តាញដ៏គ្រោះថ្នាក់» នៅទូទាំងប្រព័ន្ធផ្សព្វផ្សាយសង្គម៕