ចំនួនអ្នកស្លាប់ដោយសារទឹកជំនន់ និងបំណាក់ដីដ៏សាហាវនៅក្នុងប្រទេសស្រីលង្កា បានហក់ឡើងដល់៣៣៤នាក់ ខណៈប្រទេសនេះកំពុងប្រឹងប្រែងទប់ទល់គ្រោះមហន្តរាយអាកាសធាតុដ៏អាក្រក់បំផុតមួយរបស់ខ្លួនក្នុងរយៈពេលជាច្រើនឆ្នាំមកនេះ។

មជ្ឈមណ្ឌលគ្រប់គ្រងគ្រោះមហន្តរាយបានរាយការណ៍ថា មនុស្សជាង២០០នាក់បានបាត់ខ្លួន និងផ្ទះប្រហែល២០.០០០ខ្នងត្រូវបានបំផ្លាញ ដោយបានបញ្ជូនមនុស្ស ១០៨.០០០នាក់ទៅកាន់ជម្រកបណ្តោះអាសន្នដែលគ្រប់គ្រងដោយរដ្ឋ។ 

ក្រុមមន្ត្រីបាននិយាយថា ប្រហែលមួយភាគបីនៃប្រទេសនេះ គ្មានអគ្គិសនី ឬទឹកប្រើប្រាស់ ខណៈ ស្ថានភាពអាសន្នត្រូវបានប្រកាស បន្ទាប់ពីព្យុះស៊ីក្លូន ឌីតវ៉ា (Cyclone Ditwah)។

លោកប្រធានាធិបតី អាណូរ៉ា គូម៉ារ៉ា ឌីសសាណាយ៉ាកេ ( Anura Kumara Dissanayake )បាននិយាយថា នេះគឺជាគ្រោះមហន្តរាយធម្មជាតិដ៏លំបាកបំផុតក្នុងប្រវត្តិសាស្ត្ររបស់ប្រទេសនេះ ហើយការបំផ្លិចបំផ្លាញគឺធ្ងន់ធ្ងរណាស់ ដែលការប៉ាន់ប្រមាណសម្រាប់ការកសាងឡើងវិញ គឺគួរឱ្យបារម្ភខ្លាំងបំផុត។ 

បទបញ្ជាជម្លៀសត្រូវបានអនុវត្តនៅក្នុងតំបន់មួយចំនួន ខណៈកម្រិតទឹកក្នុងទន្លេកេឡានី(Kelani)បន្តកើនឡើងយ៉ាងឆាប់រហ័ស។

ចំនួនអ្នកស្លាប់ខ្ពស់បំផុតត្រូវបានរាយការណ៍នៅក្នុងទីក្រុង កាន់ឌី (Kandy) និង បាឌុលឡា (Badulla) ជាទីដែលតំបន់ជាច្រើននៅតែត្រូវបានកាត់ផ្តាច់ដោយសារទឹកជំនន់ដ៏ធ្ងន់ធ្ងរ៕