ទីភ្នាក់ងារគ្រោះមហន្តរាយជាតិរបស់ឥណ្ឌូនេស៊ី បានរាយការណ៍នៅថ្ងៃអាទិត្យ (៣០ វិច្ឆិកា) ថា ចំនួនអ្នកស្លាប់ដោយសារទឹកជំនន់ដ៏ធ្ងន់ធ្ងរ និងបំណាក់ដីដ៏មហន្តរាយនៅក្នុងប្រទេសនេះ បានកើនឡើងដល់ ៤៤២នាក់ហើយ ដោយមនុស្ស ៤០២នាក់ ផ្សេងទៀតនៅតែបាត់ខ្លួន ហើយយ៉ាងហោចណាស់មានមនុស្ស ៦៤៦នាក់ បានរងរបួស។

ទីក្រុងយ៉ាងតិចចំនួន២ នៅលើកោះស៊ូម៉ាត្រា ដែលរងគ្រោះខ្លាំងបំផុតរបស់ប្រទេសឥណ្ឌូនេស៊ី នៅតែមិនអាចទៅដល់បានគិតត្រឹមថ្ងៃអាទិត្យដដែលនោះ ដែលជំរុញឱ្យក្រុមអាជ្ញាធរដាក់ពង្រាយនាវាចម្បាំង ២គ្រឿង ពីទីក្រុងហ្សាកាតា ដើម្បីផ្តល់ជំនួយ និងជួយដល់ប្រជាជននៅទីនោះ។ ក្រុមជួយសង្គ្រោះកំពុងប្រឹងប្រែងដើម្បីទៅដល់តំបន់ដាច់ស្រយាល ជាទីដែលមនុស្សរាប់ពាន់នាក់ជាប់គាំងយ៉ាងអស់សង្ឈឹម ដោយពុំមានសម្ភារៈប្រើប្រាស់ចាំបាច់។

លោក Suharyanto ប្រធានទីភ្នាក់ងារគ្រោះមហន្តរាយជាតិ បាននិយាយនៅក្នុងសេចក្តីថ្លែងការណ៍មួយថា "មានទីក្រុងពីរ ដែលត្រូវការការយកចិត្តទុកខ្លាំងជាងបំផុត ដោយសារតែត្រូវកាត់ផ្ដាច់ក្នុងគ្រោះទឹកជំនន់នេះ នោះគឺក្រុង Central Tapanuli និង Sibolga"។ លោកបានបន្ថែមថា នាវាចម្បាំងទាំងនោះត្រូវបានរំពឹងថា នឹងទៅដល់ក្រុង Sibolga នៅថ្ងៃចន្ទនេះ។

នៅក្នុងភូមិ Sungai Nyalo ចម្ងាយប្រហែល ១០០គីឡូម៉ែត្រពីក្រុង Padang នៃកោះស៊ូម៉ាត្រាខាងលិច ទឹកជំនន់បានស្រកចុះភាគច្រើនហើយនៅថ្ងៃអាទិត្យ ដោយបន្សល់ទុកផ្ទះសម្បែង យានយន្ត និងដំណាំ គ្របដណ្តប់ដោយល្បប់ភក់យ៉ាងក្រាស់។ ក្រុមមន្ត្រីនិយាយថា ជំនួយត្រូវបញ្ជូនទៅកាន់តំបន់រងគ្រោះតាមផ្លូវអាកាសនិងសមុទ្រ ប៉ុន្តែភូមិខ្លះមិនទាន់ទទួលបានជំនួយនៅឡើយ ហើយមានរបាយការណ៍ថា អ្នកស្រុកនាំគ្នាលួចគ្រឿងផ្គត់ផ្គង់ និងទឹកស្អាតដើម្បីអាចបន្តរស់រានបាន៕