សមរភូមិប្រយុទ្ធរវាងភាគីជម្លោះរុស្ស៊ី និងអ៊ុយក្រែន នៅតែបន្តយ៉ាងក្ដៅគគុក បើទោះបីជាមានការជំរុញរបស់សហរដ្ឋអាមេរិក ក្នុងផែនការសន្តិភាពថ្មីក៏ដោយ។ ភាគីរុស្ស៊ី បាននិយាយកាលពីថ្ងៃអាទិត្យ (៣០ វិច្ឆិកា) ថា កងកម្លាំងប្រដាប់អាវុធរបស់ខ្លួន បានវាយរុលក្នុងទីក្រុងយុទ្ធសាស្រ្ត Pokrovsk របស់អ៊ុយក្រែន ខណៈភាគីអ៊ុយក្រែន អះអាងថា ខ្លួនវាយបកទៅវិញនូវការវាយប្រហាររបស់រុស្ស៊ី នៅថ្ងៃតែមួយ។

ក្រសួងការពារជាតិរុស្ស៊ី បាននិយាយក្នុងរបាយការណ៍របស់ខ្លួនថា ក្នុងពេល ២៤ម៉ោងកន្លងទៅនោះ កងកម្លាំងរបស់ខ្លួនបានប្រតិបត្តិការក្នុងទិសដៅជាច្រើន រួមទាំងតំបន់ Sumy និង Kharkiv ដោយវាយលុកគោលដៅ ១៤៣ទីតាំង ក្នុងប្រទេសអ៊ុយក្រែន។ នៅក្រុង Pokrovsk តំបន់ Donetsk កងទ័ពរុស្ស៊ី បានបន្តវាយរុលឆ្ពោះទៅភាគខាងកើត និងភាគពាយព្យនៃទីក្រុងនេះ។

កាលពីថ្ងៃអាទិត្យផងដែរ នាយសេនាធិការនៃកងកម្លាំងប្រដាប់អាវុធអ៊ុយក្រែន រាយការណ៍ថា ការប្រយុទ្ធ ២៧១លើក បានកើតឡើងនៅជួរមុខ ដោយកងកម្លាំងអ៊ុយក្រែន បានវាយបកនូវការវាយប្រហាររបស់រុស្ស៊ី ក្នុងទិសដៅជាច្រើន។ ប្រធានាធិបតីអ៊ុយក្រែន លោក Zelenskyy កាលពីថ្ងៃអាទិត្យ បាននិយាយថា ក្នុងសប្តាហ៍កន្លងទៅ កងកម្លាំងរុស្ស៊ី ប្រើដ្រូនប្រមាណ ១.៤០០គ្រឿង គ្រាប់បែកកំណត់គោលដៅតាមអាកាស ១.១០០គ្រាប់ និងមីស៊ីល ៦៦គ្រាប់ ប្រឆាំងនឹងអ៊ុយក្រែន។

ការប្រយុទ្ធដ៏តានតឹងនេះ បានកើតឡើងស្របពេលលោកប្រធានាធិបតីអាមេរិក Donald Trump កាលពីថ្ងៃអាទិត្យ បាននិយាយថា លោករំពឹងទុកខ្ពស់នៃកិច្ចព្រមព្រៀងសន្តិភាពរវាងរុស្ស៊ី និងអ៊ុយក្រែន បន្ទាប់ពីវឌ្ឍនភាពនៅក្នុងកិច្ចពិភាក្សាជុំថ្មីរវាងគណៈប្រតិភូអាមេរិក និងអ៊ុយក្រែន នៅរដ្ឋ Florida កាលពីចុងសប្ដាហ៍កន្លងទៅ៕