នាយករដ្ឋមន្ត្រីអ៊ីស្រាអែល លោក Benjamin Netanyahu បានបង្ហាញខ្លួននៅក្នុងតុលាការ នាថ្ងៃចន្ទ (ទី១ ខែធ្នូ) នេះ ដោយនេះជាលើកដំបូង ចាប់តាំងពីមានការស្នើសុំឲ្យប្រធានាធិបតីរបស់ប្រទេសលើកលែងទោស នៅក្នុងការកាត់ក្តីពុករលួយដ៏យូរអង្វែងរបស់លោក ជាចំណាត់ការដែលគាំទ្រដោយសម្ព័ន្ធមិត្តជិតស្និទ្ធរបស់លោក គឺលោកប្រធានាធិបតីអាមេរិក Donald Trump។

អ្នកនយោបាយបក្សប្រឆាំងបានចេញមកជំទាស់នឹងសំណើនេះ ដោយអ្នកខ្លះលើកឡើងថា ការលើកលែងទោសណាមួយ គួរតែមានលក្ខខណ្ឌតម្រូវឲ្យលោក Netanyahu ចូលនិវត្តន៍ពីនយោបាយ និងទទួលស្គាល់កំហុស។

អ្នកផ្សេងទៀតបាននិយាយថា នាយករដ្ឋមន្ត្រីត្រូវតែប្រកាសការបោះឆ្នោតជាតិជាមុនសិន ដែលនឹងត្រូវកំណត់ត្រឹមខែតុលា ឆ្នាំ២០២៦ មុនពេលមានស្នើសុំការលើកលែងទោសណាមួយ។ អតីតនាយករដ្ឋមន្ត្រី លោក Naftali Bennett បានប្រាប់ថា លោកនឹងគាំទ្រការបញ្ចប់ការកាត់ក្តី ប្រសិនបើលោក Netanyahu ត្រូវយល់ព្រមដកខ្លួនចេញពីនយោបាយ «ដើម្បីទាញអ៊ីស្រាអែលចេញពីភាពវឹកវរនេះ»។

លោក Netanyahu ដែលជានាយករដ្ឋមន្ត្រីកាន់អំណាចយូរជាងគេរបស់អ៊ីស្រាអែល ត្រូវបានចោទប្រកាន់ផ្លូវការ កាលពីឆ្នាំ២០១៩ ក្រោមការចោទប្រកាន់ពីបទស៊ីសំណូក ការក្លែងបន្លំ និងការរំលោភលើសេចក្ដីទុកចិត្ត បន្ទាប់ពីមានការស៊ើបអង្កេតជាច្រើនឆ្នាំ។ សវនាការលើករណីរបស់លោក បានចាប់ផ្តើមនៅឆ្នាំ២០២០៕