មន្ត្រីជាន់ខ្ពស់អាមេរិកមួយរូបបាននិយាយប្រាប់សារព័ត៌មានរ៉យទ័រថា ប្រធានាធិបតីអាមេរិក លោក Donald Trump បានបើកកិច្ចពិភាក្សាកាលពីថ្ងៃចន្ទ (១ ធ្នូ) ជាមួយបណ្ដាទីប្រឹក្សាជាន់ខ្ពស់ ដើម្បីពិភាក្សាអំពីយុទ្ធនាការដាក់សម្ពាធលើវ៉េណេស៊ុយអេឡា ក្នុងចំណោមប្រធានបទផ្សេងៗទៀត។

មន្ត្រីរូបនេះបន្តថា កិច្ចប្រជុំនៅការិយាល័យប្រធានាធិបតី Oval Office នោះ ក៏រួមមានសមាជិកជាន់ខ្ពស់នៃក្រុមសន្តិសុខជាតិរបស់លោក Trump ផងដែរ ប៉ុន្តែសេចក្ដីលម្អិតនៃកិច្ចពិភាក្សានៅមិនទាន់មានទេ។ កិច្ចប្រជុំនេះបានកើតឡើង ខណៈលោក Trump កំពុងបង្កើនសម្ពាធកាន់តែខ្លាំងលើវ៉េណេស៊ុយអេឡា ជុំវិញអ្វីដែលសហរដ្ឋអាមេរិកនិយាយថា ជាការដឹកជញ្ជូនគ្រឿងញៀន ដែលចេញពីប្រទេសនោះ។

កាលពីថ្ងៃសៅរ៍កន្លងទៅ លោក Trump បាននិយាយថា ដែនអាកាសនៅខាងលើ និងជុំវិញវ៉េណេស៊ុយអេឡា គួរតែត្រូវចាត់ទុកថា "បិទទាំងស្រុង" ប៉ុន្តែមិនបានលម្អិតបន្ថែមទេ ដែលបង្កឱ្យមានក្ដីបារម្ភ និងភាពច្របូកច្របល់នៅក្នុងទីក្រុងការ៉ាកាស។

កាលពីថ្ងៃអាទិត្យ លោក Trump បញ្ជាក់ថា លោកបានសន្ទនាជាមួយប្រធានាធិបតីវ៉េណេស៊ុយអេឡា លោក Nicolas Maduro ដែលអាមេរិកចាត់ទុកថាជាមេដឹកនាំខុសច្បាប់ ប៉ុន្តែលោក Trump ក៏មិនបានលម្អិតលើការសន្ទនានោះដែរ។

គួរឱ្យដឹងថា រដ្ឋបាលលោក Trump បានថ្លឹងថ្លែងពីជម្រើសនានាទាក់ទងនឹងវ៉េណេស៊ុយអេឡា ដើម្បីប្រយុទ្ធប្រឆាំងនឹងអ្វីដែលខ្លួនហៅថា ជាតួនាទីរបស់លោក Maduro ក្នុងការផ្គត់ផ្គង់គ្រឿងញៀនខុសច្បាប់ ដែលបានសម្លាប់ជនជាតិអាមេរិកអស់ជាច្រើន។ លោក Maduro តែងបដិសេធថា រូបលោកពុំមានទំនាក់ទំនងអ្វីជាមួយនឹងការជួញដូរគ្រឿងញៀនខុសច្បាប់ទាំងនោះឡើយ៕