តម្លៃប្រេងបានកើនឡើងជាថ្មីទៀត នៅក្នុងពាណិជ្ជកម្មពេលព្រឹកព្រលឹមថ្ងៃអង្គារ (២ ធ្នូ) នេះ ដែលជាកំណើនវគ្គទីពីរជាប់ៗគ្នាមកហើយ ខណៈទីផ្សារ បានវាយតម្លៃហានិភ័យភូមិសាស្ត្រនយោបាយ ដែលបណ្តាលមកពីការវាយប្រហារដោយយានដ្រូនរបស់អ៊ុយក្រែន លើទីតាំងថាមពលរុស្ស៊ី និងកំណើនភាពតានតឹងកាន់តែអាក្រក់រវាងសហរដ្ឋអាមេរិក និងវ៉េណេស៊ុយអេឡា។

សន្ទស្សន៍ប្រេងឆៅ Brent បានកើនឡើង ១៤សេន ឬ ០,២% ដល់តម្លៃ ៦៣,៣១ដុល្លារ ក្នុងមួយបារ៉ែល គិតត្រឹមម៉ោងសកល ០១:០២នាទី ឈានចូលព្រឹមព្រលឹមថ្ងៃអង្គារនេះ ខណៈប្រេងឆៅអាមេរិក WTI កើនបាន ១៨សេន ឬ ០,៣% ដល់តម្លៃ ៥៩,៥០ដុល្លារ ក្នុងមួយបារ៉ែល។ សន្ទស្សន៍គោលទាំងពីរនេះបានហក់ឡើងច្រើនជាង ១% រួចមកហើយ កាលពីថ្ងៃចន្ទកន្លងទៅ។

អ្នកវិភាគនៅក្រុមហ៊ុនប្រឹក្សាវិស័យថាមពល Ritterbusch and Associates បាននិយាយក្នុងកំណត់ត្រាមួយថា "សកម្មភាពយោធា បានគាំទ្របន្ថែមទៀតនូវគំនិតរបស់វិនិយោគិនដែលថា កិច្ចព្រមព្រៀងសន្តិភាពទំនងជាមិនកើតមានឆាប់ៗទេ ហើយថា ទីផ្សារប្រេងម៉ាស៊ូតឬប្រេងសាំង ត្រូវរំពឹងថានឹងកើនឡើងខ្លាំង ដែលកំណើននេះក៏អាចជំរុញឱ្យតម្លៃទីផ្សារប្រេងទាំងមូលកើនឡើងផងដែរ"។

ជាមួយគ្នានេះ ធនាគារ ANZ បានចេញកំណត់សម្គាល់មួយថា ការពង្រីកយុទ្ធនាការរបស់សហរដ្ឋអាមេរិក ប្រឆាំងនឹងវ៉េណេស៊ុយអេឡា កំពុងបង្កើនក្ដីបារម្ភថា ការនាំចេញប្រេងអាចនឹងរងផលប៉ះពាល់បន្ថែមទៀត ដែលជាកត្តារុញតម្លៃប្រេងក្នុងទីផ្សារដ៏សំខាន់៕