ជនអន្តោប្រវេសន៍រាប់សិបនាក់ បានប៉ះទង្គិចជាមួយនគរបាលប្រទេសប៉េរូកាលពីថ្ងៃចន្ទ ទី១ ខែធ្នូ ខណៈពួកគេព្យាយាមឆ្លងកាត់ព្រំដែនពីប្រទេសឈីលីក្នុងផ្លូវធ្វើដំណើរត្រឡប់ទៅប្រទេសកំណើតរបស់ខ្លួនវិញ។

ការធ្វើដំណើររបស់ជនអន្តោប្រវេសន៍បានកើតឡើងបន្ទាប់ពីប្រធានាធិបតីប៉េរូ លោក Jose Jeri បានប្រកាសរដ្ឋក្នុងគ្រាអាសន្ននៅតំបន់ព្រំដែនភាគខាងត្បូងរយៈពេល៦០ថ្ងៃ និងបានដាក់ពង្រាយយោធាដើម្បីទប់ស្កាត់ជនអន្តោប្រវេសន៍គ្មានឯកសារពីការចូលមកក្នុងប្រទេស។

យោងតាមរបាយការណ៍ប្រព័ន្ធផ្សព្វផ្សាយបានឲ្យដឹងថា កាលពីថ្ងៃចន្ទការប៉ះទង្គិចជាមួយនគរបាលប៉េរូ បានផ្ទុះឡើង នៅពេលដែលជនអន្តោប្រវេសន៍ប្រហែល៧០នាក់បានព្យាយាមគេចវេសពីការត្រួតពិនិត្យនៅព្រំដែនដោយមិនទទួលបានជោគជ័យ។

យោងតាមសេចក្តីថ្លែងការណ៍បានឲ្យដឹងថា រដ្ឋាភិបាលប្រទេសឈីលី និងប្រទេសប៉េរូ បានព្រមព្រៀងបើកការល្បាតរួមគ្នា និងជំរុញការផ្លាស់ប្តូរព័ត៌មានរវាងប្រទេសទាំងពីរ បន្ទាប់ពីបានរៀបចំគណៈកម្មាធិការទ្វេភាគីលើកដំបូងស្តីពីកិច្ចសហប្រតិបត្តិការអន្តោប្រវេសន៍។