ប្រធានាធិបតីរុស្ស៊ី លោក Vladimir Putin នឹងជួបជាមួយប្រេសិតពិសេសរបស់សហរដ្ឋអាមេរិក គឺលោក Steve Witkoff ក្នុងទីក្រុងមូស្គូ នៅរសៀលថ្ងៃអង្គារ (២ ធ្នូ) នេះ បន្ទាប់ពីសេតវិមាន បាននិយាយថា ទីក្រុងវ៉ាស៊ីនតោនមានសុទិដ្ឋិនិយមខ្លាំងណាស់ ចំពោះការសម្រេចបានកិច្ចព្រមព្រៀងមួយ ដើម្បីបញ្ចប់សង្រ្គាមជិត ៤ឆ្នាំនៅអ៊ុយក្រែន។

លោក Jared Kushner កូនប្រសាររបស់លោកប្រធានាធិបតីអាមេរិក Donald Trump ដែលដើរតួជាទីប្រឹក្សាមួយរូបផ្នែកការទូត ក៏រំពឹងថានឹងចូលរួមជំនួបនេះដែរ។

កិច្ចប្រជុំនេះកើតមានឡើង បន្ទាប់ពីការចរចារយៈពេល ២ថ្ងៃក្នុងរដ្ឋ Florida រវាងក្រុមមន្ត្រីអ៊ុយក្រែន និងសហរដ្ឋអាមេរិក រួមទាំងវត្តមានលោក Witkoff និងលោក Kushner ផងដែរ ក្នុងគោលបំណងកែលម្អផែនការសន្តិភាពដែលគាំទ្រដោយសហរដ្ឋអាមេរិក ដែលអ្នករិះគន់ចាត់ទុកថា ងាកទៅខាងរុស្ស៊ី។

ថ្លែងកាលពីថ្ងៃចន្ទ អ្នកនាំពាក្យសេតវិមាន លោកស្រី Karoline Leavitt បាននិយាយថា សេចក្តីព្រាងនៃកិច្ចព្រមព្រៀងសន្តិភាព "ត្រូវបានកែលម្អយ៉ាងខ្លាំង" ដោយបន្ថែមថា "រដ្ឋបាលអាមេរិកមានសុទិដ្ឋិនិយមខ្លាំង" លើផែនការបញ្ចប់សង្រ្គាមនេះ។ កាលពីសប្តាហ៍មុន លោក Putin និយាយថា លោកបានពិនិត្យមើលសេចក្តីព្រាងផែនការសន្តិភាព ដែលស្នើឡើងដោយអាមេរិករួចហើយ ហើយថា សំណើនេះអាចក្លាយជា "មូលដ្ឋាន" សម្រាប់កិច្ចព្រមព្រៀងនាពេលអនាគត ដើម្បីបញ្ចប់សង្រ្គាម៕