អ៊ុយក្រែន៖ ប្រជាពលរដ្ឋមួយចំនួនរស់នៅក្នុងតំបន់ Donetsk គ្រប់គ្រងដោយក្រុមឧទ្ទាមបានអបអរសាទរដោយការបាញ់កាំជ្រួចភ្ញី និងហ៊ោរកញ្ច្រៀវ បន្ទាប់ពីការសម្រេចចិត្តរបស់រុស្ស៊ីទទួលស្គាល់តំបន់របស់ក្រុមផ្ដាច់ខ្លួនចំនួន ២ របស់អ៊ុយក្រែនគឺតំបន់ Donetsk និងតំបន់Luhansk។
លោកប្រធានាធិបតីរុស្ស៊ី Vladimir Putin បានចុះហត្ថលេខាលើក្រឹត្យកាលពីចន្ទ ទទួលស្គាល់តំបន់ឯករាជ្យភាពរបស់តំបន់ទាំង ២ នោះ ជាសកម្មភាពមួយដែលត្រូវគេមើលឃើញជាមូលហេតុចម្បង ដែលអាចនឹងនាំឲ្យមានការឈ្លានពានដោយយោធាចូលអ៊ុយក្រែន។ ប្រជាពលរដ្ឋបាននាំគ្នាទៅកាន់តាមដងផ្លូវនានា ដើម្បីអបអរសាទរដំណឹងនេះដោយការក្រវីទង់ជាតិ និងស្រែកពាក្យថា រុស្ស៊ី រុស្ស៊ី។ សកម្មភាពនេះបានកើតឡើង ខណៈការបាញ់ផ្លោងនៅតែបន្តក្នុងតំបន់ភាគខាងកើតអ៊ុយក្រែន និងបានជំរុញឲ្យសហរដ្ឋអាមេរិក និងសហភាពអឺរ៉ុបនិយាយថា ពួកគេនឹងដាក់ទណ្ឌកម្មលើរុស្ស៊ី។ គេនៅមិនទាន់ច្បាស់នៅឡើយទេថា តើនៅពេលណាទើបកងទ័ពរុស្ស៊ីចូលទៅក្នុងប្រទេសអ៊ុយក្រែន។
ចំណែកប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃចន្ទនោះដែរបានព្យាយាមបង្ហាញពីភាពស្ងៀមស្ងាត់ ស្របពេលភាពតានតឹងកំពុងរីកកាន់តែខ្លាំងជាមួយរុស្ស៊ី ដោយប្រាប់ពលរដ្ឋរបស់លោកថា ប្រទេសអ៊ុយក្រែនមិនខ្លាចនរណាម្នាក់ ឬអ្វីឡើយ។ និយាយពីប្រតិកម្មរបស់អង្គការសហប្រជាជាតិវិញកាលពីថ្ងៃចន្ទនោះដែរ តាមរយៈអ្នកនាំពាក្យរបស់អគ្គលេខាធិការអង្គការសហប្រជាជាតិ បានរិះគន់ការសម្រេចចិត្តរបស់លោកប្រធានាធិបតីរុស្ស៊ី ដែលបានទទួលស្គាល់តំបន់ Donetsk និងតំបន់ Luhansk របស់អ៊ុយក្រែនថា ជា ការរំលោភសុចរឹតភាពអធិបតេយ្យភាពដែនដីរបស់អ៊ុយក្រែន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
