ប្រធានាធិបតីបារាំង អេម៉ានុយអែល ម៉ាក្រុង (Emmanuel Macron) បាននិយាយកាលពីថ្ងៃចន្ទថា រដ្ឋអឺរ៉ុបបានបញ្ចប់សេចក្តីព្រាងសំណើរបស់ពួកគេស្តីពីការធានាសន្តិសុខសម្រាប់អ៊ុយក្រែន បន្ទាប់ពីជម្លោះត្រូវបានបញ្ចប់ ហើយឥឡូវនេះពួកគេកំពុងរង់ចាំសហរដ្ឋអាមេរិកផ្តល់ព័ត៌មានជាក់លាក់ទាក់ទងនឹងតួនាទីរបស់ពួកគេ ក្នុងការផ្តល់ការធានាបែបនេះ។

លោក ម៉ាក្រុង បានថ្លែងបន្ទាប់ពីកិច្ចពិភាក្សារបស់លោកជាមួយលោក វ្ល៉ូឌីមី ហ្សេឡិនស្គី ប្រធានាធិបតីអ៊ុយ  ក្រែន នៅទីក្រុងប៉ារីសថា៖«យើងទើបតែបានបញ្ចប់ការងាររបស់យើងទាក់ទងនឹងការធានាសន្តិសុខ ដូចដែលខ្ញុំបាននិយាយរួចហើយ ហើយវាមានសារៈសំខាន់សម្រាប់ការផ្តល់សន្តិសុខដល់ជនជាតិអឺរ៉ុប បារាំង និងអ៊ុយក្រែន»។

លោក ម៉ាក្រុង បានថ្លែងថា៖«ការពិភាក្សាសំខាន់ៗ ត្រូវបានកំណត់ឲ្យធ្វើឡើង ក្នុងរយៈពេលប៉ុន្មានថ្ងៃខាងមុខ រវាងតំណាងមកពីសហរដ្ឋអាមេរិក និង «សម្ព័ន្ធភាពនៃឆន្ទៈ» ដើម្បីបញ្ជាក់ពីតួនាទីរបស់សហរដ្ឋអា   មេរិកទាក់ទងនឹងការធានាទាំងនេះ ស្របតាមកិច្ចព្រមព្រៀងដែលយើងបានឈានដល់កាលពីសប្តាហ៍មុន»។

លោក ម៉ាក្រុង បានបន្តថា៖«ក្នុងពេលជាមួយគ្នានេះ រុស្ស៊ីនឹងអង្គុយពិភាក្សាជាមួយអ្នកសម្របសម្រួលសហរដ្ឋអាមេរិក ដើម្បីបញ្ជាក់ពីជំហររបស់ខ្លួន»។

ប្រមុខអ្នកការទូតនៃចក្រភពអង់គ្លេស អេស្ប៉ាញ អ៊ីតាលី ប៉ូឡូញ បារាំង អាល្លឺម៉ង់ និងសហភាពអឺរ៉ុប បានឯកភាពគ្នាកាលពីដើមឆ្នាំនេះ បន្ទាប់ពីការពិគ្រោះយោបល់របស់ពួកគេនៅទីក្រុងឡុងដ៍ថា ពួកគេបានគាំទ្រការប្តេជ្ញាចិត្តរបស់ពួកគេ ក្នុងការផ្តល់ការធានាសន្តិសុខដែលអាចទុកចិត្តបានសម្រាប់អ៊ុយក្រែន ដែលរួមមានគំនិតនៃការបង្កើតសម្ព័ន្ធភាពនៃកងកម្លាំងការពារផ្លូវអាកាស ផ្លូវគោក និងផ្លូវជើងទឹក ដែលអាចជួយកសាងកងទ័ពអ៊ុយក្រែនឡើងវិញ នាពេលអនាគត។ នាពេលកន្លងទៅ រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បានថ្លែងថា វត្តមានរបស់កងទ័ពណាតូ នៅលើដីអ៊ុយក្រែន ក្រោមទង់ជាតិណាមួយ និងក្នុងសមត្ថភាពណាមួយ បង្កការគំរាមកំហែងដល់រុស្ស៊ី។ យោងតាមលោក ឡាវរ៉ូវ រុស្ស៊ីនឹងមិនទទួលយករឿងនេះទេ ទោះបីនៅក្នុងកាលៈទេសៈណាក៏ដោយ៕