នាយករដ្ឋមន្ត្រីស្លូវ៉ាគី លោក Robert Fico បានរិះគន់គំនិតនៃការផ្ទេរទ្រព្យសម្បត្តិដែលបង្កករបស់រុស្ស៊ី ឲ្យទៅអ៊ុយក្រែនថា ជាការរឹបអូសខុសច្បាប់។

លោកបានប្រាប់សន្និសីទសារព័ត៌មានមួយដែលបានចាក់ផ្សាយនៅលើទូរទស្សន៍ YouTube របស់រដ្ឋាភិបាលស្លូវ៉ាគីថា៖«ការធ្វើបែបនេះ គឺជាការរឹបអូសខុសច្បាប់ ដែលនឹងបង្កបញ្ហាដ៏ធំមួយជាមួយការដោះស្រាយ និងការឆ្លើយតបរបស់រុស្ស៊ី»។

យោងតាមលោក Fico បានឲ្យដឹងថា ប្រទេសស្លូវ៉ាគីជំទាស់នឹងគំនិតនៃការផ្ទេរទ្រព្យសម្បត្តិរបស់រុស្ស៊ី ទៅឲ្យទីក្រុងគីវ ហើយប្រឆាំងនឹងទម្រង់ណាមួយនៃការផ្តល់ហិរញ្ញប្បទានបន្ថែមទៀតដល់អរិភាពនានានោះ។

ក្នុងពេលជាមួយគ្នានេះ លោកបានសម្តែងការគាំទ្រចំពោះបទប្បញ្ញត្តិនៃផែនការសន្តិភាពរបស់សហរដ្ឋអាមេរិក ដោយនិយាយថា ទ្រព្យសម្បត្តិទាំងនេះ គួរតែត្រូវបានផ្តល់ឲ្យទីក្រុងគីវសម្រាប់តែគោលបំណងនៃការស្តារប្រទេសឡើងវិញ និងដោយមានការយល់ព្រមពីរុស្ស៊ី។ លោកបានបញ្ជាក់ថា ស្លូវ៉ាគីបដិសេធគំនិតនៃការប្រើប្រាស់ទ្រព្យសម្បត្តិរបស់រុស្ស៊ី ដើម្បីទិញអាវុធ។ លោកបានសង្កត់ធ្ងន់ថា៖«ផែនការសន្តិភាពជាជាងការបន្តសង្គ្រាម គួរតែជាអាទិភាព។ យើងត្រៀមខ្លួនរួចជាស្រេច ដើម្បីផ្តល់ជំនួយមនុស្សធម៌ដល់អ៊ុយក្រែន»៕