អគ្គលេខាធិការអង្គការសហប្រជាជាតិ (UN) លោក Antonio Guterres កាលពីថ្ងៃចន្ទ (ទី១ ខែធ្នូ) បានស្នើជាផ្លូវការនូវការកាត់បន្ថយថវិកាស្នូលរបស់ UN សម្រាប់ឆ្នាំក្រោយ ចំនួន ៥៧៧លានដុល្លារ ហើយនិងកាត់ការងារជាង ១៨ភាគរយ។

លោក Guterres កំពុងស្វែងរកវិធី ដើម្បីបង្កើនប្រសិទ្ធភាព និងកាត់បន្ថយការចំណាយ នៅពេលដែលស្ថាប័នពិភពលោកមួយនេះ គម្រប់ខួប ៨០ឆ្នាំ នៅឆ្នាំនេះ ចំពេលមានវិបត្តិសាច់ប្រាក់ ដែលភាគច្រើនបណ្ដាលមកពីការមិនបានទូទាត់របស់សហរដ្ឋអាមេរិក។

លោកបានប្រាប់គណៈកម្មាធិការថវិកាមហាសន្និបាត UN ដែលាមានសមាជិក ១៩៣ប្រទេសថា៖ «យើងបញ្ចប់ឆ្នាំ២០២៤ ជាមួយនឹងបំណុល ៧៦០លានដុល្លារ ដែល ៧០៩លានដុល្លារ នៅតែជំពាក់ពីឆ្នាំ២០២៤។ យើងក៏មិនបានទទួលចំនួន ៨៧៧លានដុល្លារ ក្នុងឆ្នាំ២០២៥ ដែរ ដូច្នេះហើយ ការជំពាក់បំណុល ឥឡូវនេះ មានចំនួន ១.៥៨៦លានដុល្លារអាមេរិក»។

ជាមួយគ្នានេះ ប្រមុខ UN រូបនេះ បានស្នើសុំថវិកាស្នូល ៣,២២៣៨ពាន់លានដុល្លារ សម្រាប់ឆ្នាំ២០២៦ ដែលកាត់បន្ថយ ១៥ភាគរយ បើធៀបនឹងឆ្នាំនេះ។ ថវិកានោះរួមមានផ្នែកនយោបាយ មនុស្សធម៌ ការរំសាយអាវុធ សេដ្ឋកិច្ច សង្គមកិច្ច និងការងារទំនាក់ទំនង។ ការរួមចំណែកវិភាគទានដល់ទីភ្នាក់ងារ មូលនិធិ និងកម្មវិធីរបស់ UN ភាគច្រើន ដូចជាកម្មវិធីស្បៀងអាហារពិភពលោក និងអង្គការកុមារ UNICEF ជាដើម គឺជាការស្ម័គ្រចិត្ត។

សហរដ្ឋអាមេរិក គឺជាអ្នកផ្តល់ជំនួយវិភាគទានធំជាងគេដល់ថវិកាស្នូលរបស់ UN ដោយបង់ប្រាក់អតិបរមា ២២ភាគរយ តាមការវាយតម្លៃដែលត្រូវបានសម្រេចដោយមហាសន្និបាត។ ប្រធានាធិបតីអាមេរិក លោក Donald Trump បានពណ៌នា UN ថា មាន «សក្តានុពលដ៏អស្ចារ្យ» ប៉ុន្តែបាននិយាយថា ស្ថាប័ននេះមិនសម្រចបាននោះទេ។ លោកចង់កាត់បន្ថយការផ្តល់មូលនិធិរបស់សហរដ្ឋអាមេរិក៕