អង្គការសុខភាពពិភពលោក (WHO) កាលពីថ្ងៃចន្ទ (ទី១ ខែវិច្ឆិកា) បានចេញផ្សាយគោលការណ៍ណែនាំដំបូងរបស់ខ្លួន ជុំវិញការប្រើប្រាស់ថ្នាំ Glucagon-Like Peptide-1 (GLP-1) ដើម្បីព្យាបាលជំងឺធាត់ ដោយឆ្លើយតបទៅនឹងអ្វីដែលត្រូវបានចាត់ទុកថា ជាវិបត្តិសុខភាពពិភពលោកដែលកំពុងកើនឡើង ពោលគឺជាស្ថានភាពដែលប៉ះពាល់ដល់មនុស្សជាង ១ពាន់លាននាក់។

ភាពធាត់ត្រូវបានផ្សារភ្ជាប់ទៅនឹងមរណភាពរបស់មនុស្សចំនួន ៣,៧លាននាក់ ក្នុងឆ្នាំ២០២៤ ហើយ WHO បានព្រមានថា ប្រសិនបើគ្មានវិធានការណ៍ច្បាស់លាស់ទេនោះ ចំនួនអ្នករស់នៅជាមួយជំងឺនេះ អាចកើនឡើងទ្វេដង នៅឆ្នាំ២០៣០។ GLP-1 គឺជាថ្នាំដែលជួយមនុស្សឲ្យមានអារម្មណ៍ឆ្អែតបានយូរ។

អគ្គនាយក WHO លោក Tedros Adhanom Ghebreyesus បានលើកឡើងនៅក្នុងសេចក្តីថ្លែងការណ៍ថា៖ «ភាពធាត់ គឺជាបញ្ហាប្រឈមសុខភាពសកលដ៏ធំមួយ ដែលអង្គការសុខភាពពិភពលោកប្តេជ្ញាដោះស្រាយ។ ការណែនាំថ្មីរបស់យើងទទួលស្គាល់ថា ភាពធាត់ គឺជាជំងឺរ៉ាំរ៉ៃដែលអាចព្យាបាលបាន ដោយមានការថែទាំយ៉ាងទូលំទូលាយ និងពេញមួយជីវិត»។

លោកបានបន្ថែមថា បើទោះបីជា «ថ្នាំតែមួយមុខ នឹងមិនដោះស្រាយវិបត្តិសុខភាពសកលនេះក៏ដោយ ក៏ការព្យាបាលដោយថ្នាំ GLP-1 អាចជួយមនុស្សរាប់លាននាក់ឲ្យជម្នះលើភាពធាត់ និងកាត់បន្ថយគ្រោះថ្នាក់ដែលពាក់ព័ន្ធនឹងជំងឺនេះ»។

យ៉ាងណាក្ដី សេចក្តីណែនាំបានបញ្ជាក់ថា ការព្យាបាលដោយថ្នាំ GLP-1 អាចនឹងត្រូវបានប្រើប្រាស់ព្យាបាលរយៈពេលវែង សម្រាប់ជំងឺធាត់ ចំពោះតែមនុស្សពេញវ័យ លើកលែងស្ត្រីមានផ្ទៃពោះ ហើយ WHO បានកត់សម្គាល់ថា ការណែនាំនេះមានលក្ខខណ្ឌ ដោយសារទិន្នន័យសុវត្ថិភាពរយៈពេលវែងមានកម្រិត ការចំណាយ និងក្ដីបារម្ភ អំពីសមធម៌ដែលអាចកើតមាន៕