ប្រធានាធិបតីនៃសាធារណរដ្ឋដូមីនីក លោក Luis Abinader កាលពីថ្ងៃចន្ទ (ទី១ ខែធ្នូ) បាននិយាយថា កិច្ចព្រមព្រៀងបណ្តោះអាសន្ន ដែលអនុញ្ញាតឲ្យបុគ្គលិកអាមេរិកចូលទៅកាន់តំបន់អាកាសយានដ្ឋានដោយមានកំណត់ សម្រាប់ប្រតិបត្តិការប្រឆាំងគ្រឿងញៀន នឹងផុតកំណត់នៅខែមេសា ឆ្នាំ២០២៦ ដោយលោកបានបញ្ជាក់ពីវិសាលភាពនៃកិច្ចព្រមព្រៀងនេះ។

កិច្ចព្រមព្រៀងនេះ គឺជាផ្នែកមួយនៃកិច្ចប្រឹងប្រែងប្រឆាំងគ្រឿងញៀនកាន់តែទូលំទូលាយ និងខ្លាំងក្លាជាងមុនរបស់សហរដ្ឋអាមេរិក នៅក្នុងតំបន់ការ៉ាអ៊ីប ដែលរដ្ឋមន្ត្រីការពារជាតិអាមេរិក លោក Pete Hegseth បាននិយាយថា លោកសង្ឃឹមថា នឹងពង្រីកទៅកាន់ប្រទេសដទៃទៀត។

អំឡុងពេលនិយាយនៅឯសន្និសីទសារព័ត៌មានប្រចាំសប្តាហ៍របស់លោក លោក Abinader បានបញ្ជាក់ថា កិច្ចព្រមព្រៀងនេះ គ្របដណ្ដប់ទាំងតំបន់ហាមឃាត់ នៅអាកាសយានដ្ឋានអន្តរជាតិ Las Americas និងមូលដ្ឋានទ័ពអាកាស San Isidro ផងដែរ។ លោកបានសង្កត់ធ្ងន់ថា សកម្មភាព គឺពាក់ព័ន្ធនឹងភស្តុភារ និងមិនពាក់ព័ន្ធនឹងការវាយប្រហារឡើយ ពោលគឺអនុញ្ញាតឲ្យយន្តហោះអាមេរិកចូលចាក់ប្រេង និងប្ដូរគ្រឿងបន្លាស់ ដើម្បីគាំទ្រដល់បេសកកម្មក្នុងតំបន់។

គួរបញ្ជាក់ថា កិច្ចព្រមព្រៀងនេះត្រូវបានចុះហត្ថលេខាកាលពីសប្តាហ៍មុន ក្នុងអំឡុងពេលដំណើរមានទស្សនកិច្ចមួយដោយលោក Hegseth ដែលបានពិពណ៌នាអំពីកិច្ចសហប្រតិបត្តិការនេះថា ជា «គំរូដែលយើងសង្ឃឹមថា នឹងពង្រីកជាមួយប្រទេសដទៃទៀត"»៕