អ្នកនាំពាក្យអង្គការសហប្រជាជាតិ(UN)លោក Stephane Dujarric និយាយថា ប្រមុខ UN មានការព្រួយបារម្ភយ៉ាងខ្លាំងចំពោះការវាយប្រហារតាមច្រកអាកាសលើនាវាវេណេស៊ុយអេឡាដែលរងការចោទប្រកាន់ថាពាក់ព័ន្ធនឹងការជួញដូរគ្រឿងញៀននៅក្នុងតំបន់ ។

លោក Dujarric និយាយថា លោកសូមរំឭកអ្នក និងសំដៅលើអ្វីដែលលោកឧត្តមស្នងការ Volker Turkរបស់ពួកយើង បាននិយាយកាលពីពេលកន្លងទៅថា ការវាយប្រហារទាំងនេះ អាចបំពានលើច្បាប់មនុស្សធម៌អន្តរជាតិ ហើយនិងអំពាវនាវឲ្យមានការស៊ើបអង្កេតប្រកបដោយតម្លាភាពលើការវាយប្រហារទាំងអស់នេះ ។

សេតវិមាននិយាយកាលពីថ្ងៃចន្ទថា រដ្ឋមន្រ្តីការពារជាតិសហរដ្ឋអាមេរិកលោក Pete Hegseth អនុញ្ញាតឲ្យឧត្តមនាវីឯក បើកការវាយប្រហារជាច្រើនលើកលើនាវាចេញពីប្រទេសវេណេស៊ុយអេឡា ដែលរងការចោទប្រកាន់ថា ដឹកគ្រឿងញៀនខុសច្បាប់កាលពីខែកញ្ញា ។

អស់រយៈពេលជាច្រើនខែមកហើយដែលសហរដ្ឋអាមេរិក បានបើកយុទ្ធនាការវាយប្រហារស្លាប់មនុស្សលើទូកសង្ស័យជួញដូរគ្រឿងញៀននៅក្នុងតំបន់ ។

ក្រុមអ្នករិះគន់បានចោទសួរពីភាពស្របច្បាប់នៃការវាយប្រហារតាមច្រកអាកាសទាំងនេះ ហើយក្រុមតំណាងរាស្រ្តមកពីគណបក្សប្រជាធិបតេយ្យ និងគណបក្សសាធារណរដ្ឋ បានសន្យាថានឹងពិនិត្យមើលករណីមួយនេះ ។

លោក Maduro និងរដ្ឋាភិបាលរបស់លោក បានច្រានចោលការជាប់ពាក់ព័ន្ធណាមួយនឹងឧក្រិដ្ឋកម្មគ្រឿងញៀន ហើយនិងបានចោទប្រកាន់សហរដ្ឋអាមេរិកថា ព្យាយាមផ្លាស់ប្តូររបប ក្នុងគោលបំណងគ្រប់គ្រងទុនបម្រុងប្រេងដ៏ធំរបស់វេណេស៊ុយអេឡា ៕