ប្រភពចំនួន៤ បានប្រាប់សារព័ត៌មានរ៉យទ័រ កាលពីថ្ងៃអង្គារ (២ ធ្នូ) ថា គណៈកម្មការអឺរ៉ុប គ្រោងនឹងបង្កើតសំណើផ្លូវច្បាប់មួយនៅសប្តាហ៍នេះ ដើម្បីប្រើប្រាស់ទ្រព្យសម្បត្តិរបស់រុស្ស៊ី ដែលត្រូវបង្កកនៅលោកខាងលិច ដើម្បីផ្តល់មូលនិធិទៅជួយអ៊ុយក្រែន ខណៈក៏័បើកចំហចំពោះលទ្ធភាពនៃឥណទាននៅលើទីផ្សារហិរញ្ញវត្ថុ ឬក៏អាចលាយជម្រើសទាំងពីរនេះបញ្ជូលគ្នា។

កាលពីខែតុលា ថ្នាក់ដឹកនាំសហភាពអឺរ៉ុប បានព្រមព្រៀងគ្នាបំពេញ "តម្រូវការហិរញ្ញវត្ថុបន្ទាន់" របស់អ៊ុយក្រែន សម្រាប់ពេល ២ឆ្នាំខាងមុខ ប៉ុន្តែបានរារែកលើផែនការប្រើប្រាស់ថវិកា ១៤០ពាន់លានអឺរ៉ូ (ឬស្មើនឹង ១៦២ពាន់លានដុល្លារ) នៅក្នុងទ្រព្យសម្បត្តិអធិបតេយ្យភាពរុស្ស៊ី ដែលត្រូវបង្កកនៅអឺរ៉ុប ជាប្រាក់កម្ចីឥតការប្រាក់សម្រាប់ទីក្រុងគីវ ដោយសារតែកង្វល់ដែលលើកឡើងដោយបែលហ្ស៊ិក។

ទ្រព្យបង្កករបស់រុស្ស៊ីភាគច្រើនដែលនៅអឺរ៉ុប គឺស្ថិតក្នុងឃ្លាំងមូលបត្របែលហ្ស៊ិក Euroclear ហើយរដ្ឋាភិបាលបែលហ្ស៊ិក បានលើកឡើងម្តងហើយម្តងទៀតអំពីហានិភ័យផ្នែកច្បាប់ និងការសងសឹកពីរុស្ស៊ី។

បណ្ដានាយកប្រតិបត្តិរបស់ប្លុកអឺរ៉ុប ត្រូវបានរំពឹងថា នឹងអនុម័តសំណើប្រើទ្រព្យបង្កកនៅថ្ងៃពុធ ទី៣ ខែធ្នូ សប្ដាហ៍នេះ ដែលរួមបញ្ចូលផែនការអនុគ្រោះរបស់ខ្លួនសម្រាប់ឥណទានឥតការប្រាក់ ទាក់ទងនឹងសមតុល្យសាច់ប្រាក់នៃទ្រព្យសកម្មរបស់ធនាគារកណ្តាលរុស្ស៊ី ដែលត្រូវបង្កក ឬមិនអាចផ្លាស់ទីបាន។ ប្រភពនិយាយថា សំណើច្បាប់នេះ នឹងរក្សាទ្វារឱ្យនៅចំហសម្រាប់ឥណទានដែលផ្តល់មូលនិធិដោយកម្ចីសហភាពអឺរ៉ុបលើទីផ្សារហិរញ្ញវត្ថុ ដើម្បីជាការផ្លាស់ប្តូររវាងជម្រើសទាំងពីរ៕