ប្រធានាធិបតីរុស្ស៊ី លោក Vladimir Putin កាលពីថ្ងៃអង្គារ (២ ធ្នូ) បានគំរាមខ្លាំងៗថា នឹងកាត់ផ្តាច់ការចូលទៅកាន់សមុទ្ររបស់អ៊ុយក្រែន ជាការឆ្លើយតបទៅនឹងការវាយប្រហារដោយយានដ្រូនលើនាវាដឹកប្រេងនៃ "កងនាវាស្រមោល" របស់រុស្ស៊ី នៅក្នុងសមុទ្រខ្មៅ។

នៅក្នុងសុន្ទរកថាតាមទូរទស្សន៍ លោក Putin បាននិយាយថា "ដំណោះស្រាយដ៏ជ្រុលនិយមបំផុតគឺជាការកាត់អ៊ុយក្រែនចេញពីសមុទ្រ បន្ទាប់មក ការវាយប្រហារលើនាវាតាមផ្លូវសមុទ្រ ជាគោលការណ៍ នឹងមិនអាចទៅរួចទៀតទេ"។ លោកក៏ព្រមានថា រុស្ស៊ីនឹងបង្កើនការវាយប្រហារលើមធ្យោបាយ និងនាវាអ៊ុយក្រែន ហើយនឹងចាត់វិធានការប្រឆាំងនាវាដឹកប្រេងរបស់ប្រទេសណា ដែលជួយដល់អ៊ុយក្រែន។

គួរឱ្យដឹងថា កាលពីថ្ងៃសៅរ៍កន្លងទៅ មន្ត្រីសន្តិសុខអ៊ុយក្រែនម្នាក់បាននិយាយថា យានដ្រូនរបស់កងទ័ពជើងទឹកអ៊ុយក្រែន បានវាយប្រហារលើនាវាដឹកប្រេង ២គ្រឿង នៅក្នុងសមុទ្រខ្មៅ ខណៈពេលនាវានោះធ្វើដំណើរទៅកាន់កំពង់ផែរុស្ស៊ី ដើម្បីផ្ទុកប្រេងយកទៅចែកចាយនៅទីផ្សារបរទេស។

កាលពីថ្ងៃអង្គារ អាជ្ញាធរដែនសមុទ្រទួរគី និងទីភ្នាក់ងារដឹកជញ្ជូន Tribeca បាននិយាយថា នាវាដឹកប្រេងដោតទង់ជាតិរុស្ស៊ី ដែលផ្ទុកដោយប្រេងឆាផ្កាឈូករ័ត្ន បានរាយការណ៍ពីការវាយប្រហារដោយយានដ្រូននៅឆ្នេរសមុទ្រទួរគី។ អ៊ុយក្រែននិយាយថា ខ្លួនពុំមានការពាក់ព័ន្ធនឹងឧប្បត្តិហេតុនោះទេ៕