នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអង្គារ (២ ធ្នូ) ថា កិច្ចព្រមព្រៀងជាមួយស៊ីរី អាចធ្វើទៅបាន ហើយលោកក៏រំពឹងថា អាជ្ញាធរស៊ីរី នឹងបង្កើតតំបន់ទ្រនាប់គ្មានយោធាមួយ ចាប់ពីទីក្រុងដាម៉ាស ដល់ភ្នំ Hermon និងទីតាំងផ្សេងទៀត។

លោក Netanyahu បានលើកឡើងបែបនេះ បន្ទាប់ពីប្រធានាធិបតីអាមេរិក Donald Trump បាននិយាយថា ពិតជាមានសារៈសំខាន់ខ្លាំងណាស់ក្នុងការដែលអ៊ីស្រាអែល រក្សា "កិច្ចសន្ទនាដ៏រឹងមាំ និងពិតប្រាកដ" ជាមួយទីក្រុងដាម៉ាស ខណៈរដ្ឋបាលរបស់លោក ព្យាយាមធ្វើអន្តរកម្ម ដើម្បីសម្រេច "កិច្ចព្រមព្រៀងមិនឈ្លានពាន" រវាងប្រទេសទាំងពីរ។

គួរឱ្យដឹងថា ស៊ីរីមិនទទួលស្គាល់ជាផ្លូវការនូវរដ្ឋអ៊ីស្រាអែលទេ ដែលបានកាន់កាប់ទឹកដីស៊ីរីកាន់តែច្រើន ចាប់តាំងពីខែធ្នូ ឆ្នាំ២០២៤មក។ អ៊ីស្រាអែល បានដណ្តើមយកតំបន់ខ្ពង់រាប Golan របស់ស៊ីរី ក្នុងសង្រ្គាមឆ្នាំ១៩៦៧ ហើយក្រោយមក ក៏ដាក់បញ្ចូលតំបន់នេះជាឧបសម្ព័ន្ធ ក្នុងជំហានមួយដែលទទួលស្គាល់ដោយសហរដ្ឋអាមេរិក ប៉ុន្តែប្រទេសផ្សេងទៀតភាគច្រើនមិនទទួលស្គាល់ឡើយ។

ថ្លែងនៅពេលចុះសួរសុខទុក្ខទាហានរបួសនៅភាគកណ្តាលអ៊ីស្រាអែល លោក Netanyahu បាននិយាយថា "អ៊ីស្រាអែលរំពឹងថា ស៊ីរីនឹងបង្កើតតំបន់ទ្រនាប់ដែលគ្មានយោធាមួយ គឺចាប់ពីទីក្រុងដាម៉ាស រួមទាំងផ្លូវទៅកាន់ភ្នំ Hermon និងកំពូលភ្នំ Hermon"។ លោកបន្ថែមថា “ដោយមានសុច្ឆន្ទៈ និងការយល់ដឹងពីគោលការណ៍ទាំងនេះ ការឈានដល់កិច្ចព្រមព្រៀងជាមួយស៊ីរីគឺអាចទៅរួច ប៉ុន្តែអ៊ីស្រាអែលនឹងឈរលើគោលការណ៍របស់ខ្លួនជានិច្ច ទោះក្នុងករណីណាក៏ដោយ”៕