ប្រធានាធិបតីសហរដ្ឋអាមេរិក លោក Donald Trump និងប្រធានាធិបតីប្រេស៊ីល លោក Luiz Inacio Lula da Silva បានជួបពិភាក្សាអំពីពាណិជ្ជកម្ម សេដ្ឋកិច្ច និងការប្រយុទ្ធប្រឆាំងឧក្រិដ្ឋកម្មរៀបចំទុកនៅក្នុងការសន្ទនាតាមទូរស័ព្ទកាលពីថ្ងៃអង្គារ ទី០២ ខែធ្នូ។

ថ្លែងទៅកាន់អ្នកសារព័ត៌មាននៅសេតវិមាន លោក Trump បាននិយាយថា មេដឹកនាំទាំងពីរក៏បានពិភាក្សាអំពីទណ្ឌកម្មផងដែរ ជាការលើកឡើងជាក់ស្តែងអំពីការកំណត់គោលដៅរបស់រដ្ឋបាលលោកទៅលើប្រព័ន្ធតុលាការរបស់ប្រទេសប្រេស៊ីលជុំវិញករណីព្រហ្មទណ្ឌរបស់អតីតប្រធានាធិបតីស្តាំនិយមលោកJair Bolsonaro។ លោក Trump បាននិយាយថា លោកនិងលោក Lula «បានសន្ទនាគ្នាយ៉ាងល្អប្រសើរ។ យើងបានពិភាក្សាអំពីពាណិជ្ជកម្ម។ យើងបាននិយាយអំពីទណ្ឌកម្ម ព្រោះដូចដែលអ្នកបានដឹងហើយថា ខ្ញុំបានដាក់ទណ្ឌកម្មទៅលើប្រទេសនេះទាក់ទងនឹងរឿងមួយចំនួនដែលបានកើតឡើង»។

វិមានប្រធានាធិបតីប្រេស៊ីល បាននិយាយនៅក្នុងសេចក្តីថ្លែងការណ៍ថា លោក Lula បានអរគុណដល់លោក Trump ចំពោះការសម្រេចចិត្តរបស់លោកក្នុងការដកចេញការដំឡើងពន្ធបន្ថែមលើការនាំចូលទំនិញប្រេស៊ីលទៅសហរដ្ឋអាមេរិក រួមមានកាហ្វេ និងសាច់គោ ហើយប្រេស៊ីលស្វែងរកវឌ្ឍនភាពលើការពិភាក្សាអំពីផលិតផលនានាដែលនៅតែរងផលប៉ះពាល់ដោយពន្ធ។ កាលពីខែមុន លោក Trump បានដកចេញការដំឡើងពន្ធ៤០% លើផលិតផលម្ហូបអាហារប្រេស៊ីលជាច្រើន រួមមានទាំងកាកាវ និងផ្លែឈើផងដែរ ដែលលោកបានប្រកាសកាលពីខែកក្កដា ដើម្បីដាក់ទណ្ឌកម្មលើប្រទេសប្រេស៊ីល ជុំវិញការចោទប្រកាន់លោក Bolsonaro ដែលជាសម្ព័ន្ធមិត្តរបស់លោក Trump។ ក្នុងអំឡុងពេលនៃការសន្ទនារយៈពេល៤០នាទីកាលពីថ្ងៃអង្គារ វិមានប្រធានាធិបតីប្រេស៊ីលចាត់ទុកថា «មានផលិតភាពខ្ពស់»ដែលលោក Lula ក៏បានសង្កត់ធ្ងន់លើភាពបន្ទាន់នៃការពង្រឹងកិច្ចសហប្រតិបត្តិការជាមួយសហរដ្ឋអាមេរិក ដើម្បីប្រយុទ្ធប្រឆាំងឧក្រិដ្ឋកម្មរៀបចំទុកជាអន្តរជាតិ។