ប្រធានាធិបតីរុស្ស៊ី លោក Vladimir Putin បានចោទប្រកាន់សម្ព័ន្ធមិត្តអឺរ៉ុប របស់ទីក្រុងគីវ កាលពីថ្ងៃអង្គារ (២ ធ្នូ) ថាកំពុងតែបំផ្លាញកិច្ចខិតខំប្រឹងប្រែង ដែលដឹកនាំដោយសហរដ្ឋអាមេរិក ដើម្បីបញ្ចប់សង្រ្គាមជិត ៤ឆ្នាំនៅអ៊ុយក្រែន ភ្លាមៗមុនពេលលោកជួបជាមួយគណៈប្រតិភូរបស់លោកប្រធានាធិបតីអាមេរិក Donald Trump ដើម្បីពិភាក្សាផែនការសន្តិភាព។

ថ្លែងនៅមុនកិច្ចចរចានៅវិមានក្រឹមឡាំង ជាមួយប្រេសិតពិសេសរបស់សហរដ្ឋអាមេរិក លោក Steve Witkoff និងកូនប្រសាររបស់ Trump គឺលោក Jared Kushner លោក Putin បាននិយាយសំដៅដល់ភាគីអឺរ៉ុបថា "ពួកគេមិនមានរបៀបវារៈសន្តិភាពទេ ពួកគេឈរនៅខាងសង្រ្គាម"។

លោកបានចោទអឺរ៉ុបថា ការធ្វើវិសោធនកម្មសំណើសន្តិភាពជាមួយនឹង "ការទាមទារដែលមិនអាចទទួលយកបានសម្រាប់រុស្ស៊ី" បែបនេះ គឺជា "ការរារាំងដំណើរការសន្តិភាពទាំងមូល" និងដើម្បីស្ដីបន្ទោសលើទីក្រុងមូស្គូ នោះហើយជាគោលដៅរបស់ពួកគេ។

ប្រធានាធិបតីរុស្ស៊ីរូបនេះក៏បានបញ្ជាក់ជាថ្មីពីជំហរជាយូរមកហើយរបស់លោកថា រុស្ស៊ីពុំមានគម្រោងវាយប្រហារអឺរ៉ុបទេ ដែលជាក្ដីបារម្ភជាប្រចាំដោយប្រទេសអឺរ៉ុបមួយចំនួន។ យ៉ាងណាមិញ លោក Puitn ក៏បានព្រមានថា៖ ប្រសិនបើអឺរ៉ុប ភ្លាមៗស្រាប់តែចង់ធ្វើសង្រ្គាមជាមួយរុស្ស៊ី ហើយជាអ្នកចាប់ផ្តើមជម្លោះ នោះរុស្ស៊ី ក៏ត្រៀមខ្លួនរួចភ្លាមៗដែរ៕