សេវាសាធារណៈសំខាន់ៗបំផុតរបស់ប្រទេសយេម៉ែនដូចជា អគ្គិសនី ទឹក ការដឹកជញ្ជូន និងទូរគមនាគមន៍ កំពុងធ្លាក់ចុះយ៉ាងខ្លាំង បន្ទាប់ពីជម្លោះជាងមួយទសវត្សរ៍ ដែលធ្វើឲ្យមនុស្សរាប់លាននាក់ កំពុងតស៊ូដើម្បីធានាបាននូវតម្រូវការជាមូលដ្ឋាន។

សង្គ្រាម ដែលបានផ្ទុះឡើងនៅចុងឆ្នាំ ២០១៤ នៅពេលដែលក្រុមហ៊ួទី បានដណ្តើមយកខេត្តភាគខាងជើងជាច្រើន និងបង្ខំឲ្យរដ្ឋាភិបាលដែលទទួលស្គាល់ដោយអន្តរជាតិចាកចេញពីទីក្រុង Sanaa បានបំផ្លាញហេដ្ឋារចនាសម្ព័ន្ធ និងធ្វើឲ្យធនធានដែលមានកម្រិតរួចទៅហើយកាន់តែអស់ទៅៗ។ ទំហំនៃការខូចខាតបានជំរុញឲ្យមនុស្សជិត ២០ លាននាក់ ពឹងផ្អែកលើជំនួយ ខណៈដែលមនុស្សជិត ៥ លាននាក់ នៅតែផ្លាស់ទីលំនៅ។ នេះបើយោងតាមទីភ្នាក់ងារទេសន្តរប្រវេសន៍របស់អង្គការសហប្រជាជាតិ។

ការដួលរលំនៃសេដ្ឋកិច្ច បានបង្កឲ្យភាពតានតឹងកាន់តែធ្ងន់ធ្ងរឡើង។ តួលេខរបស់រដ្ឋាភិបាលបង្ហាញថាទិន្នផល បានធ្លាក់ចុះជិត ៥០ ភាគរយ ហើយភាពក្រីក្របានកើនឡើងដល់ប្រហែល ៨០ ភាគរយ ដែលធ្វើឲ្យការលំបាកកាន់ខ្លាំងឡើង នៅទូទាំងប្រទេសនេះ។

នៅភាគខាងត្បូង អគ្គិសនី គឺស្ថិតក្នុងចំណោមសេវាមូលដ្ឋានដែលរងគ្រោះបំផុត។ ស្ថានីយថាមពល ត្រូវបានទម្លាក់គ្រាប់បែក រុះរើ ឬបោះបង់ចោល ហើយខ្សែបញ្ជូនចរន្តអគ្គិសនី នៅតំបន់ជួរមុខ គឺស្ថិតក្នុង សភាពខូចខាតយ៉ាងធ្ងន់ធ្ងរ។ ចំណែកនៅក្នុងទីក្រុង Aden ប្រជាពលរដ្ឋ ទ្រាំរស់នៅ ក្នុងស្ថានភាពដ៏លំបាកពីការដាច់ចរន្តអគ្គិសនីពី ១២ ទៅ ១៨ ម៉ោង ក្នុងមួយថ្ងៃ ដោយការដាច់ចរន្តអគ្គិសនី កើនឡើងខ្ពស់បំផុត ក្នុងអំឡុងពេលក្តៅនៃរដូវក្តៅ៕