សារព័ត៌មាន BBC បានរាយការណ៍ថា ចក្រភពអង់គ្លេសបានរិះគន់អ៊ីស្រាអែលចំពោះការពន្យារពេលការដឹកជញ្ជូនជំនួយទៅកាន់តំបន់ហ្កាហ្សា បន្ទាប់ពីការដឹកជញ្ជូនតង់ជាង ១,១០០ តង់ ចំណាយពេលជាងមួយឆ្នាំ ដើម្បីទៅដល់ទីនោះ។ 

រដ្ឋមន្ត្រីការបរទេស លោកស្រី Yvette Cooper បាននិយាយថា ជំនួយផ្សេងទៀតដែលផ្តល់មូលនិធិដោយចក្រភពអង់គ្លេស មិនបានទៅដល់ប្រជាជនប៉ាឡេស្ទីនទេ ទោះបីជាមានកិច្ចព្រមព្រៀងឈប់បាញ់រវាងអ៊ីស្រាអែល និងក្រុមហាម៉ាសក៏ដោយ។

អង្គការសហប្រជាជាតិបានព្រមានថា មនុស្ស ១,៥ លាននាក់ នៅក្នុងទឹកដីប៉ាឡេស្ទីន ត្រូវការជម្រក       រដូវរងាជាបន្ទាន់ ចំពេលមានភ្លៀងធ្លាក់ខ្លាំង និងសីតុណ្ហភាពធ្លាក់ចុះ។

ការដឹកជញ្ជូនតង់របស់អង់គ្លេស បានទៅដល់កាលពីថ្ងៃចន្ទ។ រចនាសម្ព័ន្ធជាច្រើនទៀត ដែលផ្ទះមួយៗអាចផ្ទុកគ្រួសារមួយដែលមានសមាជិក ៥នាក់ ត្រូវបានគេរំពឹងថា នឹងទៅដល់នៅចុងសប្តាហ៍នេះ។

ប្រភពពីរដ្ឋាភិបាលចក្រភពអង់គ្លេសបាននិយាយថា ក្នុងរដូវរងា កញ្ចប់តង់រួមបញ្ចូលគ្នា នឹងផ្តល់ជម្រកដែលត្រូវការយ៉ាងខ្លាំងសម្រាប់ប្រជាជនប៉ាឡេស្ទីនរហូតដល់ ១២.០០០នាក់។  

លោកស្រី Cooper បានបញ្ជាក់ថា ការពន្យារពេលបន្ថែមទៀតចំពោះការដឹកជញ្ជូនជំនួយ មិនអាចត្រូវបានអនុញ្ញាតទេ ដោយអំពាវនាវឲ្យបើកច្រកឆ្លងកាត់ទាំងអស់ចូលទៅក្នុងតំបន់ហ្កាហ្សា និងលទ្ធភាពទទួលបានជំនួយដោយគ្មានការរារាំង៕