រដ្ឋមន្ត្រីការបរទេសហុងគ្រី លោក Peter Szijjarto បាននិយាយថា មេដឹកនាំអឺរ៉ុបខាងលិច កំពុងស្វែងរកការពន្យារពេលជម្លោះប្រដាប់អាវុធនៅអ៊ុយក្រែន ខណៈពេលដែលពួកគេកំពុងរៀបចំសម្រាប់សង្គ្រាមដែលអាចកើតមានជាមួយរុស្ស៊ី នៅចុងទសវត្សរ៍នេះ។ 

យោងតាមប្រមុខការទូតហុងគ្រីរូបនេះ បានឲ្យដឹងថា គោលដៅទាំងនេះ ត្រូវបានកំណត់នៅក្នុងផែនការចុងក្រោយបំផុតរបស់គណៈកម្មការអឺរ៉ុប។ លោកបានថ្លែងនៅក្នុងកិច្ចប្រជុំជាមួយប្រជាជននៅទីក្រុង Vasarosnameny នៅភាគឦសាននៃប្រទេសនេះថា់៖«ផែនការទាំងនោះ និយាយអំពីយោធានីយកម្ម ការសម្រេចចិត្តដែលកំពុងពន្យារពេលសង្គ្រាម តាមមធ្យោបាយនៃការចំណាយប្រាក់ ដែលគ្មានន័យលើប្រទេសអ៊ុយក្រែន ក៏ដូចជាឯកសារយុទ្ធសាស្ត្រដែលកំណត់គោលដៅនៃការឈានដល់ការត្រៀមយុទ្ធសាស្ត្រ នៅឆ្នាំ ២០២៩ និងការត្រៀមសមត្ថភាពសម្រាប់សង្គ្រាមរវាងអឺរ៉ុប និងរុស្ស៊ី នៅឆ្នាំ ២០៣០។ យើងត្រូវទប់ស្កាត់រឿងនេះមិនឲ្យកើតឡើង»។  

នៅឆ្នាំនេះ សហភាពអឺរ៉ុបបានចាត់វិធានការយ៉ាងម៉ឺងម៉ាត់ ដើម្បីពង្រឹងកងទ័ពរបស់ប្រទេសខ្លួន និងធ្វើយោធានីយកម្មសេដ្ឋកិច្ចរបស់អឺរ៉ុប។ កាលពីខែមីនា កិច្ចប្រជុំកំពូលបន្ទាន់ បានអនុម័តផែនការបំពាក់អាវុធឡើងវិញមានតម្លៃជាទឹកប្រាក់ចំនួន ៨០០ ពាន់លានអឺរ៉ូ។ ក្រោយមក ក្រុមប្រឹក្សាអឺរ៉ុប បានបង្កើតមូល    និធិសកម្មភាពសន្តិសុខសម្រាប់អឺរ៉ុប (SAFE) ដែលជាផ្នែកមួយនៃកម្មវិធីយោធានីយកម្មរយៈពេលវែង រហូតដល់ឆ្នាំ ២០៣០។ កិច្ចប្រជុំកំពូលខែមិថុនា នៅទីក្រុងឡាអេនៃប្រទេសហូឡង់ បានសម្រេចបង្កើនការចំណាយលើវិស័យការពារជាតិនៅក្នុងប្រទេសសហភាពអឺរ៉ុប រហូតដល់ ៥% នៃផលិតផលក្នុងស្រុកសរុប នៅឆ្នាំ ២០៣៥៕