រដ្ឋបាលតាលីបង់របស់ប្រទេសអាហ្វហ្គានីស្ថាន និងប៉ាគីស្ថាន បានបើកកិច្ចចរចាសន្តិភាពថ្មី នៅអារ៉ាប៊ីសាអ៊ូឌីត ហើយបានយល់ព្រមបន្តបទឈប់បាញ់ ដែលជាការប្រឹងប្រែងចុងក្រោយបង្អស់ ដើម្បីកាត់បន្ថយភាពតានតឹង រវាងប្រទេសជិតខាងអាស៊ីខាងត្បូងទាំង២។

ក្រោយផ្ទុះឡើងនូវការប៉ះទង្គិចគ្នាបណ្ដាលឲ្យមានមនុស្សស្លាប់ នៅតាមព្រំដែន កាលពីខែតុលា បទឈប់បាញ់បានចូលជាធរមាននៅប៉ុន្មានសប្តាហ៍ថ្មីៗនេះ រវាងយោធាអាស៊ីខាងត្បូងទាំង២ បន្ទាប់ពីមានកិច្ចចរចាដែលរៀបចំដោយប្រទេសកាតា និងទួរគី ទោះបីជាភាគីទាំង២ មិនបានឈានដល់កិច្ចព្រមព្រៀងសន្តិភាពក៏ដោយ។

មន្ត្រីអាហ្វហ្គានីស្ថាន ៣នាក់ និងប៉ាគីស្ថាន ២រូប ដែលម្នាក់ក្នុងចំណោមពួកគេមានមូលដ្ឋាននៅទីក្រុងអ៊ីស្តង់ប៊ុល បានប្រាប់សារព័ត៌មាន Reuters ថា កិច្ចពិភាក្សាថ្មីនេះត្រូវបានធ្វើឡើង នៅប្រទេសអារ៉ាប៊ីសាអ៊ូឌីត។ ពួកគេបានបញ្ជាក់ថា ភាគីទាំង២ បានយល់ព្រមលើការបន្តរក្សាបទឈប់បាញ់។

ពាក់ព័ន្ធនឹងព័ត៌មាននេះ ការិយាល័យបរទេសរបស់ប៉ាគីស្ថាន យោធារបស់ប្រទេសនេះ អ្នកនាំពាក្យរបស់ក្រុមតាលីបង់អាហ្វហ្គានីស្ថាន និងរដ្ឋាភិបាលអារ៉ាប៊ីសាអូឌីត មិនបានឆ្លើយតបភា្លមៗឡើយ សម្រាប់សំណើសុំការអត្ថាធិប្បាយពីសារព័ត៌មាន Reuters។

កិច្ចពិភាក្សានេះបានធ្វើឡើងតាមគំនិតផ្តួចផ្តើមរបស់អារ៉ាប៊ីសាអ៊ូឌីត ដែលមន្ត្រីជាន់ខ្ពស់ម្នាក់ ក្នុងចំណោមមន្ត្រីតាលីបង់អាហ្វហ្គានីស្ថាន បានប្រាប់ថា «យើងបើកចំហ សម្រាប់កិច្ចប្រជុំបន្ថែមទៀត ដើម្បីទទួលបានលទ្ធផលវិជ្ជមាន»៕