កាលពីថ្ងៃអង្គារម្សិលមិញអារ៉ាប៊ីសាអ៊ូឌីត បានអនុម័តថវិការដ្ឋរបស់ខ្លួនសម្រាប់ឆ្នាំ ២០២៦ ដោយព្យាករឱនភាពសារពើពន្ធទាបជាងមុន ពេលដែលពួកគេផ្លាស់ប្តូរការចំណាយ ដើម្បីផ្តល់អាទិភាពលើវិស័យជាច្រើន ដូចជាវិស័យឧស្សាហកម្ម និងភស្តុភារ ជាការជំរុញកំណើនប្រាក់ចំណូលមិនបានមកពីប្រេង ។

រាជាណាចក្រមួយនេះ បានព្យាករឱនភាព ៤៤ពាន់លានដុល្លារ ឬស្មើនឹងប្រហែល ៣,៣ភាគរយនៃផលិតផលក្នុងស្រុកសរុប(GDP) ។ វានឹងធ្លាក់ចុះពីចំនួនជាង ៦៥,២ពាន់លានដុល្លារ ដែលបច្ចុប្បន្នពួកគេប៉ាន់ប្រមាណសម្រាប់ឆ្នាំនេះ ក្រោយតម្លៃប្រេងទាបជាងមុន ហើយការផលិតដាក់បន្ទុកលើប្រាក់ចំណូល និងការចំណាយលើសកម្រិតថវិកាប្រហែល ៤ភាគរយ ។

អារ៉ាប៊ីសាអ៊ូឌីតដែលជាប្រទេសនាំចេញប្រេងកំពូលរបស់ពិភពលោក ស្ថិតនៅពាក់កណ្តាលផ្លូវនៃផែនការចក្ខុវិស័យឆ្នាំ ២០៣០ របស់ខ្លួនសម្រាប់ការផ្លាស់ប្តូរសេដ្ឋកិច្ច ។

យុទ្ធសាស្រ្តដែលបានដាក់ចេញដោយរជ្ជទាយាទអារ៉ាប៊ីសាអ៊ូឌីតព្រះអង្គម្ចាស់ Mohammed bin Salman កាលពីឆ្នាំ ២០១៦នេះ សុំឲ្យមានប្រាក់រាប់រយពាន់លានដុល្លារនៅក្នុងការវិនិយោគរបស់រដ្ឋាភិបាល ដើម្បីផ្ដាច់សេដ្ឋកិច្ចរាជាណាចក្រមួយនេះ ចេញពីការពឹងផ្អែកលើប្រាក់ចំណូលអ៊ីដ្រូកាបូន ។

  យោងតាមគម្រោងថវិកា បានឲ្យដឹងថា ឆ្នាំ ២០២៦ នឹងចាប់ផ្តើមដំណាក់កាលទី ៣នៃចក្ខុវិស័យឆ្នាំ ២០៣០ ដែលជាសញ្ញាផ្លាស់ប្តូរការផ្តោតអារម្មណ៍លើការចាប់ផ្តើមកំណែទម្រង់សេដ្ឋកិច្ច ទៅជាការបង្កើនប្រសិទ្ធភាពអតិបរមានៃផលប៉ះពាល់របស់ពួកគេវិញ ។

 យោងតាមសេចក្តីរាយការណ៍ពីទីភ្នាក់ងារ SPA បានឲ្យដឹងថា រជ្ជទាយាទអារ៉ប៊ីសាអ៊ូឌីត ចាត់ទុកដំណាក់កាលថ្មីនេះថា ជាការពន្លឿនជំហានវឌ្ឍនភាព និងបង្កើនឱកាសកំណើន ដើម្បីសម្រេចបានផលប៉ះពាល់ប្រកបដោយនិរន្តរភាពនៅឆ្នាំ ២០៣០ ៕