​សហភាព​អឺរ៉ុប៖ ប្រធាន​គោលនយោបាយ​សហភាព​អឺរ៉ុប​បាន​និយាយ​ថា សមាជិក​សហភាព​អឺរ៉ុប​បាន​ព្រមព្រៀង​លើ​កញ្ចប់​ទណ្ឌកម្ម​ថ្មី​ប្រឆាំង​នឹង​រុស្ស៊ី ដែល​មាន​បំណង​បង្ក​ឲ្យ​មានការ​ខូចខាត​ធ្ងន់ធ្ងរ​ដល់​ប្រទេស​រុស្ស៊ី បន្ទាប់ពី​ការ​ទទួលស្គាល់​តំបន់​ផ្ដាច់​ខ្លួន​ចំនួន​ ២​ នៅ​ក្នុង​ប្រទេស​អ៊ុយ​ក្រែ​ន​។

​លោក Josep Borrell បាន​និយាយ​កាលពី​ថ្ងៃ​អង្គា​រថា សមាជិក​សហភាព​អឺរ៉ុប​ទាំង​ ២៧​ប្រទេស​បាន​យល់​ព្រម​ជា​ឯកច្ឆន្ទ​លើ​វិធានការ​នានា នៅ​ឯ​កិច្ចប្រជុំ​ក្រៅផ្លូវការ​មួយ​ក្នុង​ទីក្រុង​ប៉ារីស​ក្រៅ​វេទិកា​អន្តរជាតិ។ ទណ្ឌកម្ម​ទាំងនោះ​ក៏​នឹង​ត្រូវ​ដាក់​ផង​ដែរ​លើ​ក្រុម​សមាជិកសភា​រុស្ស៊ី ដែល​គាំទ្រ​ឲ្យ​មាន​ការ​ទទួលស្គាល់​តំបន់​ផ្ដាច់​ខ្លួន​ជា​តំបន់​ឯករាជ្យ ដែល​ជា​ការសម្រេចចិត្ត​ប្រកាស​ឡើង​ដោយ​លោក​ប្រធានាធិបតី Vladimir Putin កាលពី​ថ្ងៃ​ច័ន្ទ​។ ថ្លែង​នៅ​ឯ​សន្និសីទ​សារព័ត៌មាន​ជាមួយ​រដ្ឋមន្ត្រី​ការបរទេស​បារាំងលោក Jean-Yves Le Drian លោក Borrell បាន​និយាយ​ថា ទណ្ឌកម្ម​ទាំងនោះ​នឹង​ប៉ះពាល់​ដល់​រុស្ស៊ី ហើយ​ប៉ះពាល់​ខ្លាំង​ទៀត​ផង។

​លោក​បាន​បន្ថែម​ថា គោលដៅ​នានា​សម្រាប់​ការ​បង្កក​ទ្រព្យសម្បត្តិ និង​បម្រាម​លើ visa ឬ​ទិដ្ឋាការ បាន​រួម​បញ្ចូល​ទាំង សមាជិក​ចំនួន ៣៥១​នាក់​នៃ​សភា​ដូ​មា ដែល​ជា​សភា​ជាន់​ទាប​របស់​រុស្ស៊ី ដែល​បាន​អំពាវនាវ​ឲ្យ​លោក Putin ទទួលស្គាល់​តំបន់​២ គឺ Donetsk និង Luhansk នៅ​ក្នុង​ប្រទេស​អ៊ុយ​ក្រែ​ន ជា​តំបន់​ឯករាជ្យ​៕

អត្ថបទ៖ សុខមាន