គូស្រករប៉ាឡេស្ទីនរាប់រយនាក់ បានរៀបមង្គលការទ្រង់ទ្រាយធំនៅទីក្រុង Khan Younis តំបន់ហ្កាហ្សា កាលពីថ្ងៃអង្គារម្សិលមិញ ។

 ជាមួយនឹងការគ្រវីទង់ប៉ាឡេស្ទីន និងទះដៃតាមចង្វាក់ភ្លេង គូស្រករទាំងនេះ បានអបអរសហជីពគូស្វាមីភរិយាថ្មីចំនួន ៥៤ គូ ។

 អាពាហ៍ពិពាហ៍ទ្រង់ទ្រាយធំនេះ ស្ថិតក្រោមការឧបត្ថម្ភពីប្រតិបត្តិការ Al-Faris Al-Shahim របស់អារ៉ាប់រួម ក្រោយពួកគេដាក់ចេញគំនិតផ្តួចផ្តើមជាច្រើន ដើម្បីគាំទ្រពលរដ្ឋហ្កាហ្សា ។

 លោក Maher Mezher គឺជាមេដឹកនាំក្រុមរណសិរ្សរំដោះជនប៉ាឡេស្ទីន និយាយថា នៅថ្ងៃនេះ ពួកយើងស្ថិតនៅចំពោះមុខដំណាក់កាលមួយ ក្នុងចំណោមដំណាក់កាលតស៊ូរបស់ប៉ាឡេស្ទីន ។ កាលពីម្សិលមិញ ពួកយើងស្ថិតក្រោមការសម្លាប់រង្គាល និងការបំផ្លិចបំផ្លាញ ហើយថ្ងៃនេះ ជនប៉ាឡេស្ទីនរបស់ពួកយើង មានសិទ្ធិសប្បាយរីករាយ និងមានសិទ្ធិបញ្ចេញស្នាមញញឹមរបស់ក្មេងៗ ស្រ្តី ហើយនិងបំភ្លេចទុក្ខព្រួយទាំងអម្បាលមាណ ។

លោកបន្តថា វាគឹជាសារមួយចំពោះឃាតករ និងឧក្រិដ្ឋជន មិនថា រដ្ឋមន្រ្តីសន្តិសុខជាតិអ៊ីស្រាអែលលោក Ben-Gvir ឬរដ្ឋមន្រ្តីហិរញ្ញវត្ថុអ៊ីស្រាអែលលោក Bezalel Smotrich ឬនាយករដ្ឋមន្រ្តីអ៊ីស្រាអែលលោក Benjamin Netanyahuទេថា ជនប៉ាឡេស្ទីនរបស់ពួកយើងឱបក្រសោបជីវិត ស្រលាញ់ជីវិត ពួកយើងនឹងតស៊ូ និងប្រឹងប្រែង តាមរយៈអាពាហ៍ពិពាហ៍នេះ និងតាមគ្រប់ទម្រង់នៃជីវិត ។

អ្នកស្រី Um Rajab ដែលជាម្តាយរបស់កូនក្រមុំ Kuzba និយាយដែរថា ពួកយើងពិតជាសប្បាយរីករាយ និងត្រេកអរខ្លាំងណាស់នៅថ្ងៃនេះ ពេលដែលព្រះធ្វើឲ្យកូនៗទាំងនេះ សប្បាយរីករាយ ក្រោយសង្រ្គាម ការកាប់សម្លាប់ និងការបាត់បង់មនុស្សជាទីស្រលាញ់ និងអ្នកជិតខាង ហើយនិងការបំផ្លិចបំផ្លាញផ្ទះសម្បែងរបស់ពួកយើង ។

អ្នកស្រីបន្តថា មង្គលការនេះផ្តល់ឱកាសសំខាន់សម្រាប់មនុស្សទាំងអស់ចាប់ពីទីក្រុង Rafah រហូតដល់ទីក្រុង Beit Hanoun ៕