ផ្លាកឈ្មោះរបស់លោកប្រធានាធិបតីអាមេរិក Donald Trump ត្រូវបានដាក់តាំងនៅពីមុខអគាររបស់វិទ្យាស្ថានសន្តិភាពសហរដ្ឋអាមេរិក ក្នុងទីក្រុងវ៉ាស៊ីនតោនឌីស៊ី ជាទីដែលរូបលោកត្រូវបានគេរំពឹងថា នឹងធ្វើជាម្ចាស់ផ្ទះទទួលប្រធានាធិបតីនៃប្រទេសរ្វ៉ាន់ដា និងសាធារណរដ្ឋប្រជាធិបតេយ្យកុងហ្គោ នៅថ្ងៃព្រហស្បតិ៍ ទី៤ ខែធ្នូ នេះ សម្រាប់ពិធីចុះហត្ថលេខាលើកិច្ចព្រមព្រៀងសន្តិភាព ដែលសម្របបសម្រួលដោយសហរដ្ឋអាមេរិក។

នៅពេលត្រូវសាកសួរអំពីការសម្រេចចិត្តដាក់ឈ្មោះប្រធានាធិបតីលើអគារនោះ អ្នកនាំពាក្យសេតវិមាន លោកស្រី Anna Kelly បានលើកឡើងថា វិទ្យាស្ថានសន្តិភាពសហរដ្ឋអាមេរិក ត្រូវបានប្តូរឈ្មោះដាក់តាមប្រធានាធិបតី។

លោកស្រីបន្តថា “ឥឡូវនេះ វិទ្យាស្ថានសន្តិភាព Donald J. Trump មានទាំងភាពស្រស់ស្អាតនិងត្រឹមត្រូវ តាមឈ្មោះប្រធានាធិបតី ដែលបញ្ចប់សង្គ្រាមចំនួន៨ ក្នុងពេលតិចជាង ១ឆ្នាំ ហើយនឹងបន្តធ្វើជាការរំលឹកដ៏មានអានុភាព នូវអ្វីដែលភាពជាអ្នកដឹកនាំដ៏រឹងមាំអាចសម្រេចបាន សម្រាប់ស្ថិរភាពរបស់ពិភពលោក”។

គួរឱ្យដឹងថា ក្រុមឧទ្ទាម M23 ដែលគាំទ្រដោយរ្វ៉ាន់ដា បានបើកការបាញ់ប្រហារនៅភាគខាងកើតកុងហ្គោ ក្នុងឆ្នាំនេះ ដោយដណ្តើមបានក្រុងធំៗចំនួនពីរក្នុងតំបន់ និងបង្កើនការភ័យខ្លាចនៃសង្គ្រាមកាន់តែទូលំទូលាយ។ ក្រោយមក កិច្ចព្រមព្រៀងសន្តិភាពមួយដែលសម្របសម្រួលដោយអាមេរិក ត្រូវសម្រេចបានក្នុងខែមិថុនាកន្លងទៅ ក្នុងគោលបំណងបញ្ចប់ជម្លោះ៕