សភារបស់ប្រទេសអ៊ុយក្រែន កាលពីថ្ងៃពុធ (៣ ធ្នូ) បានអនុម័តកញ្ចប់ថវិកាឆ្នាំ២០២៦ ដោយគ្រោងនឹងបែងចែកជិត ១ភាគ៣ នៃផលិតផលក្នុងស្រុកសរុប (GDP) របស់ប្រទេសនេះ ដាក់លើវិស័យការពារជាតិ ខណៈសង្រ្គាមជាមួយរុស្ស៊ី នៅតែបន្តយ៉ាងក្ដៅគគុក។

ថវិកានេះត្រូវបានអនុម័តដោយសមាជិកសភាចំនួន ២៥៧រូប នៅក្នុងការបោះឆ្នោតមួយដែលត្រូវបានអ្នកវិភាគនយោបាយមើលឃើញថា ជាការសាកល្បងដ៏សំខាន់សម្រាប់សភាអ៊ុយក្រែន ក្នុងការរក្សាឯកភាព និងគាំទ្រសេចក្ដីសម្រេចធំៗ ក្នុងអំឡុងពេលដំណាក់កាលសំខាន់នៃសង្រ្គាម។

លោកប្រធានាធិបតី Volodymyr Zelenskyy បាននិយាយថា "នេះគឺជាសញ្ញាដ៏សំខាន់នៃភាពធន់របស់អ៊ុយក្រែន និងការធានាបាននូវការផ្តល់ហិរញ្ញវត្ថុប្រកបដោយស្ថិរភាពសម្រាប់តម្រូវការនៅឆ្នាំក្រោយ"។ រដ្ឋមន្ត្រីហិរញ្ញវត្ថុ លោក Serhii Marchenko បាននិយាយថា អត្រាប្រហែល ២៧,២% នៃ GDP នឹងត្រូវបានបញ្ជូនទៅផ្នែកយោធា និងការផលិត និងទិញសព្វាវុធ។

លោក Marchenko បន្តថា ឱនភាពថវិកាសម្រាប់ឆ្នាំក្រោយ ត្រូវបានកំណត់ត្រឹម ១៨,៥% នៃ GDP ដោយបន្ថែមថា បញ្ហាប្រឈមសំខាន់បំផុតសម្រាប់ទីក្រុងគីវ គឺជាការធានាឱ្យបាននូវហិរញ្ញប្បទានពីខាងក្រៅ ដើម្បីជួយបំពេញចន្លោះប្រហោងនេះ។ លោកសង្កត់ធ្ងន់ថា អ៊ុយក្រែននឹងត្រូវការហិរញ្ញប្បទានពីខាងក្រៅជាង ៤៥ពាន់លានដុល្លារ ក្នុងឆ្នាំ២០២៦៕