ទីភ្នាក់ងារសារព័ត៌មាន IRNA ដែលគ្រប់គ្រងដោយរដ្ឋអ៊ីរ៉ង់ បានរាយការណ៍ថា មនុស្សជាង ២១០.000នាក់ ដែលមានបញ្ហាបេះដូង និងផ្លូវដង្ហើម បានស្វែងរកការថែទាំបន្ទាន់ នៅក្នុងប្រទេសអ៊ីរ៉ង់ ចាប់ពីថ្ងៃទី ២២ ខែវិច្ឆិកា ដល់ថ្ងៃទី ០១ ខែធ្នូ ខណៈដែលការបំពុលខ្យល់ បានកើនឡើងយ៉ាងខ្លាំង នៅក្នុងទីក្រុងជាច្រើន។ 

សារព័ត៌មាន IRNA បានដកស្រង់សម្តីលោក Jafar Miadfar ប្រធានអង្គការសេវាវេជ្ជសាស្ត្របន្ទាន់របស់ប្រទេសអ៊ីរ៉ង់ដែលបាននិយាយថា ចំនួនអ្នកជំងឺច្រើនជាងគេ គឺស្ថិតនៅក្នុងខេត្ត Tehran, Khorasan Razavi, Khuzestan និងខេត្ត Alborz ដែលបង្កើន«ការព្រួយបារម្ភយ៉ាងធ្ងន់ធ្ងរសម្រាប់ក្រុមងាយរងគ្រោះ និងសុខភាពទូទៅរបស់សាធារណជន»។ 

លោក Miadfar បានព្រមានថា ប្រសិនបើកម្រិតនៃការបំពុលនៅតែខ្ពស់ ការសម្រាកព្យាបាលនៅមន្ទីរពេទ្យ និងករណីនៃជំងឺសរសៃឈាមបេះដូង និងផ្លូវដង្ហើម នឹងបន្តកើនឡើង ជាពិសេសក្នុងចំណោមមនុស្សចាស់ កុមារ និងមនុស្សដែលមានបញ្ហាសុខភាពរ៉ាំរ៉ៃ។

ប្រជាជននៅក្នុងទីក្រុងធំៗរបស់អ៊ីរ៉ង់ បានប្រឈមមុខនឹងគុណភាពខ្យល់កាន់តែអាក្រក់ ក្នុងរយៈពេលពីរសប្តាហ៍កន្លងមកនេះ ដោយសន្ទស្សន៍គុណភាពខ្យល់លើសពី ១៥០ ដែលជាកម្រិតមួយដែលត្រូវបានចាត់ទុកថា មានគ្រោះថ្នាក់ចំពោះសុខភាពសម្រាប់ក្រុមមនុស្សទាំងអស់។

ដើម្បីកំណត់ហានិភ័យសុខភាព និងកាត់បន្ថយការបំពុលខ្យល់ អាជ្ញាធរពេលខ្លះ បានបិទសាលារៀន និងសាកលវិទ្យាល័យ អនុញ្ញាតឲ្យធ្វើការពីចម្ងាយ និងដាក់កម្រិតចរាចរណ៍នៅក្នុងតំបន់ ដែលមានការបំពុលខ្លាំងបំផុត៕