ប្រភពព័ត៌មានក្នុងស្រុក បានរាយការណ៍ពីការប៉ះទង្គិចគ្នាប្រដាប់អាវុធរវាងកងទ័ពយេម៉ែន ភក្តីភាពជាមួយរដ្ឋាភិបាលទទួលស្គាល់ដោយអន្តរជាតិ និងកងកម្លាំង STC អំឡុងការប៉ុនប៉ងមួយរបស់ក្រុមផ្តាច់ខ្លួន ដើម្បីរុលទៅកាន់តំបន់យុទ្ធសាស្រ្ត al-Ghuraf ស្ថិតនៅខេត្តសម្បូរប្រេង Hadramout ។

រូបភាពវីដេអូឃ្លីបបង្ហោះដោយក្រុមសកម្មជនក្នុងស្រុកឃើញកងកម្លាំង STC វាយប្រហារអគារវិមានប្រធានាធិបតីនៅទីក្រុង Seiyun ស្ថិតនៅភាគខាងត្បូងប្រទេសយេម៉ែន កាលពីថ្ងៃពុធ បន្ទាប់ពីការប៉ះទង្គិចគ្នាជាមួយកងទ័ពយេម៉ែន ។

ប្រភព័ត៌មានបន្តថា កងកម្លាំង STC បានឈរជើងនៅតំបន់ Jathma ស្ថិតខ្ពង់រាប Seiyun មុនពេលពួកគេបំផ្ទុះគ្រាប់បែកនៅទីស្នាក់ការកណ្តាលកងទ័ពយេមែន ស្ថិតនៅកណ្តាលទីក្រុង ។ 

យោងតាមសេចក្តីរាយការណ៍ពីសារព័ត៌មានក្នុងស្រុក បានឲ្យដឹងថា ខេត្ត Hadramout បានមើលឃើញប្រតិបត្តិការយោធាទ្រង់ទ្រាយធំ ចាប់តាំងពីព្រឹកថ្ងៃពុធរហូតមក ដោយមានការបាញ់ផ្លោងកាំភ្លើងធំដ៏ខ្លាំងក្លាផងដែរ ។

ក្រុមផ្តាច់ខ្លួន STC កាលពីមុន បានអំពាវនាវឲ្យមានការបំបែកខ្លួននៅតំបន់ភាគខាងត្បូង ចេញពីយេម៉ែន ។ ពួកគេគ្រប់គ្រងតំបន់មួយចំនួននៅភាគខាងត្បូង រួមទាំងទីក្រុង Aden ផងដែរ ៕