ការព្យាករទឹកភ្លៀងនៅថ្ងៃព្រហស្បតិ៍នេះ បង្កក្តីបារម្ភពីការខូចខាតបន្ថែមទៀតនៅប្រទេសឥណ្ឌូនេស៊ី និងស្រីលង្កាដែលបានរងគ្រោះរួចទៅហើយដោយសារទឹកជំនន់ ក្រោយគ្រោះមហន្តរាយធម្មជាតិ បានសម្លាប់មនុស្សជាង ១.៥០០នាក់ តាមបណ្តាប្រទេសចំនួន ៤ នៅតំបន់អាស៊ី ។

នៅប្រទេសឥណ្ឌូនេស៊ី ទីភ្នាក់ងារឧតុនិយម បានព្រមានថា ខេត្តចំនួន ៣ដែលរងផលប៉ះពាល់ខ្លាំងបំផុតនៅកោះស៊ូម៉ាត្រា នឹងមានភ្លៀងធ្លាក់នៅថ្ងៃព្រហស្បតិ៍ និងថ្ងៃសុក្រ ។ 

ភ្លៀងធ្លាក់ខ្លាំង បានកើតមានកាលពីយប់កន្លងទៅ ប៉ុន្តែមកទល់នឹងពេលនេះ ពុំទាន់ឈានដល់កម្រិតដែលនាំឲ្យមានទឹកជំនន់ដ៏កំហុក និងបំណាក់ដីដូចកាលពីសប្តាហ៍មុននោះឡើយ ។

គិតត្រឹមថ្ងៃព្រហស្បតិ៍នេះ ចំនួនមនុស្សស្លាប់ដោយសារគ្រោះមហន្តរាយធម្មជាតិនៅប្រទេសឥណ្ឌូនេស៊ី បានកើនឡើងដល់ ៧៧៦នាក់ ក្នុងនោះមនុស្ស ៥៦០នាក់ផ្សេងទៀត កំពុងបាត់ខ្លួន ។

នៅជម្រកបណ្តោះអាសន្នស្ថិតក្នុងទីក្រុង Pandan ខេត្ត North Sumatra អ្នកស្រី Sabandi វ័យ ៥៤ឆ្នាំ និយាយថា អ្នកស្រីនៅមានអារម្មណ៍តក់ស្លុតចំពោះទឹកជំនន់ដែលបានបំផ្លិចបំផ្លាញផ្ទះសម្បែងរបស់គាត់កាលពីសប្តាហ៍មុន ។

អ្នកស្រីនិយាយពីការព្យាករទឹកភ្លៀងថា ពួកយើងមានអារម្មណ៍ខ្លាចខ្លាំងណាស់ ។ ពួកយើងខ្លាច បើសិនជាមានភ្លៀងធ្លាក់បង្កជាទឹកជំនន់ម្តងទៀត ។

អ្នកស្រីបន្តថា អ្នកស្រីបានរង់ចាំនៅលើដំបូលផ្ទះរបស់គាត់អស់រយៈពេល ២ថ្ងៃ ដោយគ្មានអាហារ ឬទឹកផឹក មុនពេលគាត់ត្រូវបានគេជម្លៀសចេញ ៕