លោកប្រធានាធិបតី Vladimir Putin បានព្រមានជាថ្មីទៀតថា កងទ័ពអ៊ុយក្រែនត្រូវតែដកថយពីតំបន់    ដុនបាស (Donbas) ភាគខាងកើតរបស់អ៊ុយក្រែន បើពុំនោះសោត រុស្ស៊ីនឹងដណ្តើមយក ដោយបដិសេធការសម្របសម្រួលណាមួយលើរបៀបបញ្ចប់សង្គ្រាមនៅអ៊ុយក្រែន។       

លោកបានប្រាប់សារព័ត៌មាន India Today ថា ពួកលោករំដោះទឹកដីទាំងនេះដោយកម្លាំង ពុំនោះកងទ័ពអ៊ុយក្រែន នឹងចាកចេញពីទឹកដីទាំងនេះ ។ ទីក្រុងមូស្គូគ្រប់គ្រងប្រហែល ៨៥% នៃតំបន់  ដុនបាស។

ជាដរាប លោកប្រធានាធិបតីអ៊ុយក្រែន Volodymyr Zelenskyy បានច្រានចោលការប្រគល់ទឹកដី។

ការអត្ថាធិប្បាយរបស់មេដឹកនាំរុស្ស៊ីរូបនេះ បានកើតឡើងបន្ទាប់ពីលោកប្រធានាធិបតី Donald Trump បាននិយាយថា ក្រុមអ្នកចរចារបស់លោកកំពុងពិភាក្សាអំពីផែនការសន្តិភាពរបស់សហរដ្ឋអាមេរិក ដោយលោកជឿថា មេដឹកនាំរុស្ស៊ីចង់បញ្ចប់សង្គ្រាម បន្ទាប់ពីការចរចាកាលពីថ្ងៃអង្គារសប្ដាហ៍នេះនៅទីក្រុងមូស្គូ។  

លោក Steve Witkoff បេសកជនរបស់លោក Trump ដែលទើបតែវិលត្រឡប់មកពីការពិភាក្សាជាមួយលោក Putin នៅទីក្រុងមូស្គូ គ្រោងជួបជាមួយក្រុមអ្នកចរចាអ៊ុយក្រែននៅរដ្ឋ Florida សហរដ្ឋអាមេរិក។

យ៉ាងណាក៏ដោយ លោក Trump បាននិយាយថា កិច្ចចរចាកាលពីថ្ងៃអង្គារនៅវិមានក្រឹមឡាំងគឺ ល្អ ដោយបន្ថែមថា វាលឿនពេកក្នុងការនិយាយថា តើមានអ្វីកើតឡើង ព្រោះថានៅមានបញ្ហាជាច្រើនទៀតដែលភាគីទាំងពីរត្រូវបន្តពិភាក្សា៕