រដ្ឋមន្ត្រីសន្តិសុខមាតុភូមិរបស់អាមេរិក លោកស្រី Kristi Noem នៅថ្ងៃព្រហស្បតិ៍ (៤ ធ្នូ) បាននិយាយថា រដ្ឋបាលរបស់លោកប្រធានាធិបតី Donald Trump មានផែនការពង្រីកចំនួនប្រទេស ដែលរងការហាមឃាត់ធ្វើដំណើរចូលសហរដ្ឋអាមេរិក ទៅដល់ជាង ៣០ប្រទេស នៅក្នុងជំហានរឹតបន្តឹងផ្នែកអន្តោប្រវេសន៍កាន់តែខ្លាំងឡើង បន្ទាប់ពីហេតុការណ៍បាញ់ប្រហារឆ្មាំជាតិនៅជិតសេតវិមាន។

ក្នុងបទសម្ភាសន៍លើទូរទស្សន៍ Fox News លោកស្រី Noem ត្រូវបានសាកសួរថា តើរដ្ឋបាលលោក Trump នឹងបង្កើនចំនួនប្រទេសក្នុងបញ្ជីហាមឃាត់ធ្វើដំណើរដល់ ៣២ប្រទេសដែរឬទេ លោកស្រី Noem បដិសេធមិនលម្អិតលើតួលេខជាក់លាក់ឡើយ ដោយគ្រាន់តែនិយាយថា "នឹងមានលើសពី ៣០ប្រទេស"។ រដ្ឋមន្រ្តីរូបនេះមិនបញ្ជាក់ទេថា ប្រទេសណាខ្លះនឹងត្រូវបន្ថែមចូលបញ្ជី។

លោក Trump បានចុះហត្ថលេខាលើសេចក្តីប្រកាសមួយកាលខែមិថុនា ដោយហាមប្រាមពលរដ្ឋ ១២ប្រទេស មិនឱ្យចូលសហរដ្ឋអាមេរិក និងដាក់កំហិតលើពលរដ្ឋ ៧ប្រទេស ផ្សេងទៀត ដោយនិយាយថា ជំហាននេះចាំបាច់ដើម្បីការពារប្រឆាំងនឹង "ភេរវករបរទេស" និងការគំរាមកំហែងផ្នែកសន្តិសុខ។ បម្រាមនេះអនុវត្តចំពោះទាំងជនអន្តោប្រវេសន៍ និងមិនមែនអន្តោប្រវេសន៍ ដូចជាអ្នកទេសចរ សិស្សនិស្សិត និងអ្នកធ្វើដំណើរអាជីវកម្មជាដើម។

សេចក្ដីរាយការណ៍របស់សារព័ត៌មានរ៉យទ័រ ផ្អែកលើឯកសារផ្ទៃក្នុងរបស់ក្រសួងការបរទេស បានឱ្យដឹងថា រដ្ឋបាលលោក Trump កំពុងពិចារណាហាមឃាត់ពលរដ្ឋ ៣៦ប្រទេស មិនឱ្យចូលអាមេរិក។ ការពង្រីកបញ្ជីហាមឃាត់នេះកើតឡើងបន្ទាប់ពីការបាញ់ប្រហារលើសមាជិកឆ្មាំជាតិ ២នាក់ នៅទីក្រុងវ៉ាស៊ីនតោន កាលពីសប្តាហ៍មុន ដែលជនជាតិអាហ្វហ្គានីស្ថានម្នាក់ត្រូវចាប់ខ្លួនជាជនសង្ស័យ៕