ប្រធានាធិបតីសហរដ្ឋអាមេរិក លោក Donald Trump បានស្វាគមន៍មេដឹកនាំរបស់ប្រទេសរ៉្វាន់ដា និងសាធារណរដ្ឋប្រជាធិបតេយ្យកុងហ្គោ(DRC) ក្នុងការចុះហត្ថលេខាលើកិច្ចព្រមព្រៀងសន្តិភាព ដែលអាចបញ្ចប់ជម្លោះរវាងប្រទេសទាំងពីរ។ ទោះបីជាអំពើហិង្សានៅមិនទាន់បានបញ្ឈប់ក៏ដោយ លោក Trump បានស្វាគមន៍កិច្ចព្រមព្រៀងដែលសម្របសម្រួលដោយសហរដ្ឋអាមេរិកកាលពីថ្ងៃព្រហស្បតិ៍ ថាជាជំពូកថ្មីមួយសម្រាប់តំបន់នោះ។

លោក Trump និយាយថា «វាជាថ្ងៃដ៏អស្ចារ្យ ថ្ងៃដ៏អស្ចារ្យសម្រាប់ទ្វីបអាហ្វ្រិក ថ្ងៃដ៏អស្ចារ្យសម្រាប់ពិភពលោក និងសម្រាប់ប្រទេសទាំងពីរនេះ» «ហើយពួកគេមានរឿងរ៉ាវច្រើនដែលមានមោទនភាព»។ កិច្ចព្រមព្រៀងនេះ ត្រូវបានឈានដល់ដំបូងកាលពីខែមិថុនា។

ប្រធានាធិបតីសាធារណរដ្ឋប្រជាធិបតេយ្យកុងហ្គោ លោក Felix Tshisekedi និងសមភាគីរ៉្វាន់ដា លោក Paul Kagame បានជួបគ្នានៅប្រទេសកាតាកាលពីខែមីនា ដោយផ្តួចផ្តើមកិច្ចចរចាដែលនាំឱ្យមានកិច្ចព្រមព្រៀង។ កិច្ចព្រមព្រៀងនេះ បានបង្កើនក្តីសង្ឃឹមក្នុងការបញ្ចប់ជម្លោះនៅក្នុងសាធារណរដ្ឋប្រជាធិបតេយ្យកុងហ្គោ ជាកន្លែងដែលចលនាក្រុម M23 ជាក្រុមប្រដាប់អាវុធគាំទ្រដោយរ៉្វាន់ដា បាននិងកំពុងរុលទៅមុខកាន់តែចូលជ្រៅទៅក្នុងភាគខាងកើតប្រទេសដែលសម្បូរទៅដោយធនធាន។ អំពើហិង្សាកើតមានឡើងវិញ បានបង្កើនការព្រួយបារម្ភពីជម្លោះពេញបន្ទុក ស្រដៀងទៅនឹងសង្គ្រាមដែលសាធារណរដ្ឋប្រជាធិបតេយ្យកុងហ្គោបានទប់ទល់កាលពីចុងទសវត្សរ៍ឆ្នាំ១៩៩០ ពាក់ព័ន្ធនឹងប្រទេសអាហ្វ្រិកជាច្រើន និងបានសម្លាប់មនុស្សរាប់លាននាក់។ ការត្អូញត្អែរចម្បងរបស់ប្រទេសរ៉្វាន់ដាជាមួយសាធារណរដ្ឋប្រជាធិបតេយ្យកុងហ្គោ ផ្តោតសំខាន់លើការចោទប្រកាន់ថាប្រទេសអាហ្វ្រិកកណ្តាលមួយនេះបានផ្តល់ទីជម្រកដល់កងជីវពលជនជាតិភាគតិច Hutu ពាក់ព័ន្ធទៅនឹងអំពើប្រល័យពូជសាសន៍រ៉្វាន់ដាឆ្នាំ១៩៩៤ ដែលបានកំណត់គោលដៅលើប្រជាជន Tutsi របស់ប្រទេស។