ការិយាល័យរដ្ឋមន្ត្រីក្រសួងការពារជាតិអ៊ីស្រាអែល បាននិយាយនៅថ្ងៃសុក្រ (៥ ធ្នូ) នេះថា ថវិកាការពារជាតិរបស់ប្រទេសនេះសម្រាប់ឆ្នាំ២០២៦ ត្រូវបានកំណត់ក្នុងចំនួន ១១២ពាន់លានស្ហាកែល (ប្រមាណ ៣៤,៦៣ ពាន់លានដុល្លារអាមេរិក) ពោលគឺកើនឡើងពីថវិកាចំនួន ៩០ពាន់លានស្ហាកែល ក្នុងសេចក្តីព្រាងពីមុន បើទោះបីជាសង្រ្គាមហ្កាហ្សា ត្រូវបានផ្អាកក្រោមបទឈប់បាញ់ក៏ដោយ។

រដ្ឋមន្ត្រីការពារជាតិ លោក Israel Katz និងរដ្ឋមន្ត្រីហិរញ្ញវត្ថុ លោក Bezalel Smotrich បានឯកភាពលើក្របខណ្ឌចំណាយលើវិស័យការពារជាតិនេះ ខណៈដែលគណៈរដ្ឋមន្ត្រី បានចាប់ផ្តើមកិច្ចពិភាក្សាពីថវិកាឆ្នាំ២០២៦ ដែលចាំបាច់ត្រូវអនុម័តផ្លូវការឱ្យបាន នៅត្រឹមខែមីនា ខាងមុខ បើពុំនោះសោត អាចនាំទៅរកការបោះឆ្នោតថ្មី។

បណ្ដារដ្ឋមន្ត្រីបានចាប់ផ្តើមសម័យប្រជុំជាបន្តបន្ទាប់របស់ខ្លួនកាលពីថ្ងៃព្រហស្បតិ៍ មុនការបោះឆ្នោត នៅព្រឹកថ្ងៃសុក្រនេះ។ ប្រសិនបើថវិកានេះទទួលបានការគាំទ្រ នោះនឹងត្រូវបញ្ជូនទៅសភាដើម្បីបោះឆ្នោតដំបូង។ សង្គ្រាមតំបន់ហ្កាហ្សា បានធ្វើឱ្យអ៊ីស្រាអែល ចំណាយអស់ ៣១ពាន់លានដុល្លារ ក្នុងឆ្នាំ២០២៤ ទៅលើជម្លោះយោធាជាមួយក្រុមហាម៉ាស និងជាមួយក្រុមហេសបូឡា នៅលីបង់។

តាំងពីពេលនោះមក អ៊ីស្រាអែល បានចុះកិច្ចព្រមព្រៀងឈប់បាញ់ជាមួយក្រុមសកម្មប្រយុទ្ធទាំងពីរ។ ទោះជាយ៉ាងនេះក្ដី ថវិកាការពារជាតិរបស់អ៊ីស្រាអែល នៅតែមិនអន់ថយ ដោយការិយាល័យរបស់លោក Smotrich បាននិយាយថា ថវិកាឆ្នាំ២០២៦ នេះមានកំណើន ៤៧ពាន់លានស្ហាកែល បើធៀបនឹងឆ្នាំ២០២៣ នៅមុនពេលសង្រ្គាម៕